sahra se tahi the ram-e-dariya mein nahin the

sahrā se tahī the ram-e-dariyā meñ nahīñ the

ham log tire kunj-e-fasāna meñ nahīñ the

dil ḳhud se judā ho ke unheñ DhūñD rahā thā

vo din ki jo imkān-e-zamāna meñ nahīñ the

ik hairat-e-raushan sī rahī chashm ke hamrāh

ham garche fusūñ-ḳhāna-e-fardā meñ nahīñ the

jab zaḳhm damak uTThā to vo bhī palaT aa.e

shāmil jo kabhī rasm-e-mudāvā meñ nahīñ the

the tujh se varā naqsh kisī aur ke raushan

ham ḳhāk-basar terī tamanna meñ nahīñ the

ḳhushbū ke tasalsul kī rivāyat ke haiñ ham log

kab phuul se ham bāġh-e-zamāna meñ nahīñ the

maiñ Dūbtī sāñsoñ kī tarah TuuT rahī thī

tum ġham kī tarah chashm-e-tamāshā meñ nahīñ the

mai-rang na the chashm-e-bahārāñ ke bulāve

ab ke vo nashe shoḳhī-e-mīnā meñ nahīñ the

ham chāh-talab aur the tum jāh-talab aur

yūsuf se chalan ishq-e-zuleḳhā meñ nahīñ the

sahra se tahi the ram-e-dariya mein nahin the

hum log tere kunj-e-fasana mein nahin the

dil KHud se juda ho ke unhen DhunD raha tha

wo din ki jo imkan-e-zamana mein nahin the

ek hairat-e-raushan si rahi chashm ke hamrah

hum garche fusun-KHana-e-farda mein nahin the

jab zaKHm damak uTTha to wo bhi palaT aae

shamil jo kabhi rasm-e-mudawa mein nahin the

the tujh se wara naqsh kisi aur ke raushan

hum KHak-basar teri tamanna mein nahin the

KHushbu ke tasalsul ki riwayat ke hain hum log

kab phul se hum bagh-e-zamana mein nahin the

main Dubti sanson ki tarah TuT rahi thi

tum gham ki tarah chashm-e-tamasha mein nahin the

mai-rang na the chashm-e-bahaaran ke bulawe

ab ke wo nashe shoKHi-e-mina mein nahin the

hum chah-talab aur the tum jah-talab aur

yusuf se chalan ishq-e-zuleKHa mein nahin the