sahraon mein ja pahunchi hai shahron se nikal kar

sahrāoñ meñ jā pahuñchī hai shahroñ se nikal kar

alfāz kī ḳhushbū mire hoñToñ se nikal kar

siine ko mire kar gayā ik aan meñ raushan

ik nuur kā kauñdā tirī āñkhoñ se nikal kar

maiñ qatra-e-shabnam thā magar aaj huuñ sūraj

aa baiThā huuñ maiñ sadiyoñ meñ lamhoñ se nikal kar

ho jā.eñge bastī ke dar-o-bām munavvar

sūraj abhī chamkegā darīchoñ se nikal kar

kyā jāniye ab kaun sī jānib ko gayā hai

ik zard sā chehra tirī galiyoñ se nikal kar

har samt thā ik talḳh haqā.eq kā samundar

dekhā jo tasavvur ke jazīroñ se nikal kar

vo pyaas hai miTTī pe zabāñ pher rahe haiñ

ham aa.e haiñ ehsās ke sho.aloñ se nikal kar

har aan sadā dete haiñ ma.asūm ujāle

'betāb' chale aao dhuñdlakoñ se nikal kar

sahraon mein ja pahunchi hai shahron se nikal kar

alfaz ki KHushbu mere honTon se nikal kar

sine ko mere kar gaya ek aan mein raushan

ek nur ka kaunda teri aankhon se nikal kar

main qatra-e-shabnam tha magar aaj hun suraj

aa baiTha hun main sadiyon mein lamhon se nikal kar

ho jaenge basti ke dar-o-baam munawwar

suraj abhi chamkega darichon se nikal kar

kya jaaniye ab kaun si jaanib ko gaya hai

ek zard sa chehra teri galiyon se nikal kar

har samt tha ek talKH haqaeq ka samundar

dekha jo tasawwur ke jaziron se nikal kar

wo pyas hai miTTi pe zaban pher rahe hain

hum aae hain ehsas ke shoalon se nikal kar

har aan sada dete hain masum ujale

'betab' chale aao dhundlakon se nikal kar