sahraon mein KHak uDai surat majnun wali ki

sahrāoñ meñ ḳhaak uḌaa.ī sūrat majnūñ vaalī kī

mutanabbī ko sāmne rakkhā nazmeñ paḌhī haiñ 'hālī' kī

ūñToñ ko bhī le aayā 'iqbāl' ke sāqī-nāma tak

yā'nī mujh se charvāhe ne urdu kī rakhvālī kī

ḳhema uThā.e sahrā sahrā shāyad yuuñ phirtā na kabhī

ḳhāna-badoshan sun letī gar yaaro baat savālī kī

aas kī pariyāñ qasr-e-dil kī chhat par aanā bhuul ga.iiñ

jab se ḳhvāb meñ sūrat dekhī sindhī ajrak vaalī kī

'mīr' kī turbat par ġhazloñ ne ro-ro rakh diiñ apnī chhab

maqta' Tāñkne vāloñ ne jab had kar dī bad-halī kī

naranag kī vaadī meñ ik birhan gaa.e hijr kā raag

Thahar zarā ai 'ḳhāna-badoshā' suujh hai gar santhālī kī

sahraon mein KHak uDai surat majnun wali ki

mutanabbi ko samne rakkha nazmen paDhi hain 'haali' ki

unTon ko bhi le aaya 'iqbaal' ke saqi-nama tak

ya'ni mujh se charwahe ne urdu ki rakhwali ki

KHema uThae sahra sahra shayad yun phirta na kabhi

KHana-badoshan sun leti gar yaro baat sawali ki

aas ki pariyan qasr-e-dil ki chhat par aana bhul gain

jab se KHwab mein surat dekhi sindhi ajrak wali ki

'mir' ki turbat par ghazlon ne ro-ro rakh din apni chhab

maqta' Tankne walon ne jab had kar di bad-hali ki

naranag ki wadi mein ek birhan gae hijr ka rag

Thahar zara ai 'KHana-badosha' sujh hai gar santhaali ki