sailab ka guzar bhi to logon ki maut hai

sailāb kā guzar bhī to logoñ kī maut hai

dariyā kā bāñjh-pan jahāñ nahroñ kī maut hai

kuchh bhī to kahnā rū-ba-rū bahroñ ke hai fuzūl

jaise ḳhalā meñ chīḳhnā chīḳhoñ kī maut hai

rasta saḌak talak na musāfir ko deñ agar

mere ḳhayāl meñ to ye galiyoñ kī maut hai

āñkhoñ se niiñd ke sabhī āsār gum-shuda

shab bhar hamārā jāgnā ḳhvāboñ kī maut hai

māhaul kī hifāzateñ lāzim haiñ dosto

titlī kī maut asl meñ phūloñ kī maut hai

bārish ho dhuup meñ ki dhanak āsmāñ pe ho

āñkheñ na hoñ to ye bhī nazāroñ kī maut hai

bikhre paḌe haiñ jā-ba-jā kitne hī ḳhāl-o-ḳhad

ya.anī ki TuuTā aa.ina chehroñ kī maut hai

be-shak fasīl jī uThī gaare ke vaar se

lekin 'zamān' ye to darāḌoñ kī maut hai

sailab ka guzar bhi to logon ki maut hai

dariya ka banjh-pan jahan nahron ki maut hai

kuchh bhi to kahna ru-ba-ru bahron ke hai fuzul

jaise KHala mein chiKHna chiKHon ki maut hai

rasta saDak talak na musafir ko den agar

mere KHayal mein to ye galiyon ki maut hai

aankhon se nind ke sabhi aasar gum-shuda

shab bhar hamara jagna KHwabon ki maut hai

mahaul ki hifazaten lazim hain dosto

titli ki maut asl mein phulon ki maut hai

barish ho dhup mein ki dhanak aasman pe ho

aankhen na hon to ye bhi nazaron ki maut hai

bikhre paDe hain ja-ba-ja kitne hi KHal-o-KHad

yani ki TuTa aaina chehron ki maut hai

be-shak fasil ji uThi gare ke war se

lekin 'zaman' ye to daraDon ki maut hai