saKHawaton ke bahane se chhal rahe hain log

saḳhāvatoñ ke bahāne se chhal rahe haiñ log

na jaane kaun se sāñche meñ Dhal rahe haiñ log

masarrateñ na jinheñ raas aa.iiñ auroñ kī

ġhamoñ kī dhuup meñ baiThe pighal rahe haiñ log

jo ḳhud-parast haiñ insāñ mafād ke paikar

unhīñ ke makr fareboñ meñ Dhal rahe haiñ log

kahāñ maiñ aa gayā is bazm meñ sukūñ ke liye

yahāñ to aap hī aapas meñ jal rahe haiñ log

na jaane kaun sī mushkil meñ phañs ga.ī duniyā

misāl-e-ātish-e-ḳhāmosh jal rahe haiñ log

vo niim vaalī galī ab nazar nahīñ aatī

tamām shahr kā naqsha badal rahe haiñ log

zarā tū ghar se nikal kar to dekh duniyā ko

har ek gaam pe 'svāmī' badal rahe haiñ log

saKHawaton ke bahane se chhal rahe hain log

na jaane kaun se sanche mein Dhal rahe hain log

masarraten na jinhen ras aain auron ki

ghamon ki dhup mein baiThe pighal rahe hain log

jo KHud-parast hain insan mafad ke paikar

unhin ke makr farebon mein Dhal rahe hain log

kahan main aa gaya is bazm mein sukun ke liye

yahan to aap hi aapas mein jal rahe hain log

na jaane kaun si mushkil mein phans gai duniya

misal-e-atish-e-KHamosh jal rahe hain log

wo nim wali gali ab nazar nahin aati

tamam shahr ka naqsha badal rahe hain log

zara tu ghar se nikal kar to dekh duniya ko

har ek gam pe 'swami' badal rahe hain log