saKHt dushwar hai aasan koi mushkil hona

saḳht dushvār hai āsāñ koī mushkil honā

dil ko ab tak mire aaya hī nahīñ dil honā

kab muhāl un se mulāqāt hai ai dil honā

shart hai us ke liye jazba-e-kāmil honā

vāqif-e-kūcha-e-jānāñ nahīñ miltā koī

haañ mire shauq zarā rahbar-e-manzil honā

pech taqdīr ke nikleñ bhī to nikleñ kyūñkar

yād-e-gesū meñ jo sīkhā to salāsil honā

hashr barpā kahīñ duniyā-e-mohabbat meñ na ho

tum na be-parda numāyāñ sar-e-mahfil honā

pā.emālī meñ maze bosa-e-pā ke letā

dil-e-nā-fahm ko aaya hī nahīñ dil honā

aa.ina pheñk bhī do bad-nazarī kartā hai

us kā sheva hai muqābil ke muqābil honā

ek duniyā tire hamrāh hai dil vāloñ kī

ab na mahfil meñ kahīñ zīnat-e-mahfil honā

nuur se apne baḌhāte raho 'kaukab' kī ziyā

ho mubārak tumheñ rashk-e-mah-e-kāmil honā

saKHt dushwar hai aasan koi mushkil hona

dil ko ab tak mere aaya hi nahin dil hona

kab muhaal un se mulaqat hai ai dil hona

shart hai us ke liye jazba-e-kaamil hona

waqif-e-kucha-e-jaanan nahin milta koi

han mere shauq zara rahbar-e-manzil hona

pech taqdir ke niklen bhi to niklen kyunkar

yaad-e-gesu mein jo sikha to salasil hona

hashr barpa kahin duniya-e-mohabbat mein na ho

tum na be-parda numayan sar-e-mahfil hona

paemali mein maze bosa-e-pa ke leta

dil-e-na-fahm ko aaya hi nahin dil hona

aaina phenk bhi do bad-nazari karta hai

us ka shewa hai muqabil ke muqabil hona

ek duniya tere hamrah hai dil walon ki

ab na mahfil mein kahin zinat-e-mahfil hona

nur se apne baDhate raho 'kaukab' ki ziya

ho mubarak tumhein rashk-e-mah-e-kaamil hona