sakun mila hai magar iztirab jaisa hai

sakūñ milā hai magar iztirāb jaisā hai

tire badan kā fusūñ bhī sharāb jaisā hai

hañse vo laakh magar zabt-e-ġham kī tahrīreñ

na chhup sakeñgī ki chehra kitāb jaisā hai

milegā paas se kuchh bhī na ḳhaak o ḳhuuñ ke sivā

palaT chaleñ ki ye manzar sarāb jaisā hai

na koī peḌ na saaya na āhaToñ kā gumāñ

ye justujū kā safar bhī azaab jaisā hai

vo sāmne hai magar us ko chhū nahīñ saktā

maiñ pūjtā huuñ vo paikar jo ḳhvāb jaisā hai

sulag rahe ho yūñhī ġham kī dhuup se 'rāshid'

vo haath chuum ke dekho gulāb jaisā hai

sakun mila hai magar iztirab jaisa hai

tere badan ka fusun bhi sharab jaisa hai

hanse wo lakh magar zabt-e-gham ki tahriren

na chhup sakengi ki chehra kitab jaisa hai

milega pas se kuchh bhi na KHak o KHun ke siwa

palaT chalen ki ye manzar sarab jaisa hai

na koi peD na saya na aahaTon ka guman

ye justuju ka safar bhi azab jaisa hai

wo samne hai magar us ko chhu nahin sakta

main pujta hun wo paikar jo KHwab jaisa hai

sulag rahe ho yunhi gham ki dhup se 'rashid'

wo hath chum ke dekho gulab jaisa hai