salaf se log un pe mar rahe hain hamesha jaanen liya karenge

salaf se log un pe mar rahe haiñ hamesha jāneñ liyā kareñge

yahī karishme huā kiye haiñ yahī karishme huā kareñge

hameñ jo be-jurm pīste ho ye jānte ho ki kyā kareñge

ḳhudā ne chāhā to surma ho kar tumhārī āñkhoñ meñ jā kareñge

na rahne deñge kabhī vo bāham tapāk dekheñge un meñ jis dam

badan se ḳhārij kareñge jaañ ko jigar se dil ko judā kareñge

chamak hai us meñ mohabbatāna ye be-qarārī hai āshiqāna

mazā uThā.eñge dard-e-dil kā kabhī na is kī davā kareñge

baḌhā to hai rabt ham se tum se ḳhudā ne chāhā to dekh loge

tumhāre pahlū meñ yaar dil kī tarah hamesha rahā kareñge

kisī kā ehsān ham na leñge kisī ko taklīf kuchh na deñge

ḳhudā ne paidā kiyā hai ham ko ḳhudā hī se iltijā kareñge

jab ā.eñge vo pa.e-ayādat to hogī dil ko umīd-e-sehhat

zamāna mujh ko duā karegā masīh merī davā kareñge

nahīñ ḳhush-a.amāl agar nahīñ huuñ farishte turbat meñ ḳhashmagīñ hoñ

ḳhudā kī rahmat se mutma.in huuñ ye kyā kareñge vo kyā kareñge

tamām hote haiñ dekh jā.ūñ jamāl aa ke hameñ dikhāo

tumhāre ġham meñ laboñ pe dam hai koī ghaḌī meñ qazā kareñge

rahegī yaad un kī ḳhush-ḳhirāmī mirā suḳhan hai ye lā-kalāmī

qadam na parde se vo nikāleñ mirī nazar meñ phirā kareñge

rulā.e jaatī hai un kī hasrat chalī hī aatī hai mujh ko riqqat

raheñgī kaahe ko merī āñkheñ jo yūñhī aañsū bahā kareñge

milā hai ārām āshiyāñ kā nahīñ kuchh andesha bāġhbāñ kā

rihā bhī hoñge to aa ke aksar ham is qafas meñ rahā kareñge

kahīñ Thikānā nahīñ hamārā tumhārī shafqat kā hai sahārā

ġharīb haiñ do hameñ dilāsā tumhāre haq meñ duā kareñge

laraz rahe haiñ satāne vaale ḳhudā ke aage ka.ī haiñ naale

gurez un se karegā mahshar ye vo qayāmat bapā kareñge

agar chhuTe bhī qafas se bulbul karegī barbād hasrat-e-gul

rasā.ī hogī na āshiyāñ tak chaman meñ tinke chunā kareñge

qubūl hogī duā hamārī kareñge jis dam ham āh-o-zārī

kabhī na jā.egī uupar uupar hamārī hājat ravā kareñge

nigāheñ un par jo ham ne Dālīñ unhoñ ne āñkheñ 'sharaf' nikālīñ

sitam ye Dhāyā hai kam-sinī meñ javān ho ke vo kyā kareñge

salaf se log un pe mar rahe hain hamesha jaanen liya karenge

yahi karishme hua kiye hain yahi karishme hua karenge

hamein jo be-jurm piste ho ye jaante ho ki kya karenge

KHuda ne chaha to surma ho kar tumhaari aankhon mein ja karenge

na rahne denge kabhi wo baham tapak dekhenge un mein jis dam

badan se KHarij karenge jaan ko jigar se dil ko juda karenge

chamak hai us mein mohabbatana ye be-qarari hai aashiqana

maza uThaenge dard-e-dil ka kabhi na is ki dawa karenge

baDha to hai rabt hum se tum se KHuda ne chaha to dekh loge

tumhaare pahlu mein yar dil ki tarah hamesha raha karenge

kisi ka ehsan hum na lenge kisi ko taklif kuchh na denge

KHuda ne paida kiya hai hum ko KHuda hi se iltija karenge

jab aaenge wo pae-ayaadat to hogi dil ko umid-e-sehhat

zamana mujh ko dua karega masih meri dawa karenge

nahin KHush-amal agar nahin hun farishte turbat mein KHashmagin hon

KHuda ki rahmat se mutmain hun ye kya karenge wo kya karenge

tamam hote hain dekh jaun jamal aa ke hamein dikhao

tumhaare gham mein labon pe dam hai koi ghaDi mein qaza karenge

rahegi yaad un ki KHush-KHirami mera suKHan hai ye la-kalami

qadam na parde se wo nikalen meri nazar mein phira karenge

rulae jati hai un ki hasrat chali hi aati hai mujh ko riqqat

rahengi kahe ko meri aankhen jo yunhi aansu baha karenge

mila hai aaram aashiyan ka nahin kuchh andesha baghban ka

riha bhi honge to aa ke aksar hum is qafas mein raha karenge

kahin Thikana nahin hamara tumhaari shafqat ka hai sahaara

gharib hain do hamein dilasa tumhaare haq mein dua karenge

laraz rahe hain satane wale KHuda ke aage kai hain nale

gurez un se karega mahshar ye wo qayamat bapa karenge

agar chhuTe bhi qafas se bulbul karegi barbaad hasrat-e-gul

rasai hogi na aashiyan tak chaman mein tinke chuna karenge

qubul hogi dua hamari karenge jis dam hum aah-o-zari

kabhi na jaegi upar upar hamari hajat rawa karenge

nigahen un par jo hum ne Dalin unhon ne aankhen 'sharaf' nikalin

sitam ye Dhaya hai kam-sini mein jawan ho ke wo kya karenge