salib lad ke kandhe pe chal raha hun main

salīb laad ke kāñdhe pe chal rahā huuñ maiñ

hisār-e-zāt se bāhar nikal rahā huuñ maiñ

hayāt DhūñDhtī phirtī hai mujh ko sar-gardāñ

adhūrā jism liye ruḳh badal rahā huuñ maiñ

banā diyā hai zamāne ne mujh ko patthar sā

ki zarb-e-tesha se ātish ugal rahā huuñ maiñ

mirī nigāh meñ duniyā chitā kī raakh sī hai

isī ḳhayāl ke sho.aloñ meñ jal rahā huuñ maiñ

bulā rahī hai mujhe apne ghar kī vīrānī

miyān-e-shor-e-salāsil machal rahā huuñ maiñ

zamāna DhūñDegā mujh ko dur-e-sadaf kī tarah

ki buuñd buuñd samundar meñ Dhal rahā huuñ maiñ

salib lad ke kandhe pe chal raha hun main

hisar-e-zat se bahar nikal raha hun main

hayat DhunDhti phirti hai mujh ko sar-gardan

adhura jism liye ruKH badal raha hun main

bana diya hai zamane ne mujh ko patthar sa

ki zarb-e-tesha se aatish ugal raha hun main

meri nigah mein duniya chita ki rakh si hai

isi KHayal ke shoalon mein jal raha hun main

bula rahi hai mujhe apne ghar ki virani

miyan-e-shor-e-salasil machal raha hun main

zamana DhunDega mujh ko dur-e-sadaf ki tarah

ki bund bund samundar mein Dhal raha hun main