saliqa hi na aaya ashk-ha-e-dida-e-tar se

salīqa hī na aaya ashk-hā-e-dīda-e-tar se

barasne kī jagah Thahre Thaharne kī jagah barse

tire dar tak mire nāloñ kī shān-e-nā-rasā.ī bhī

kuchh aisī hai ki jaise tiir Takrā jaa.e patthar se

abhī hangāma-ārā dil meñ hai ik ishrat-e-rafta

abhī tak terī ḳhushbū aa rahī hai mere bistar se

bhare ghar meñ mire josh-e-junūñ se ḳhauf-e-rusvā.ī

mujhe ifshā-e-rāz-e-ishq kā khaTkā bhare ghar se

maiñ phir āġhāz-e-ulfat kā natīja sochne baiThūñ

mujhe tum gudgudā kar phir nikal jaao barābar se

mujhe to 'shād' ke har sher meñ tā.īd miltī hai

kisī rū-e-munavvar se kisī zulf-e-mo.ambar se

saliqa hi na aaya ashk-ha-e-dida-e-tar se

barasne ki jagah Thahre Thaharne ki jagah barse

tere dar tak mere nalon ki shan-e-na-rasai bhi

kuchh aisi hai ki jaise tir Takra jae patthar se

abhi hangama-ara dil mein hai ek ishrat-e-rafta

abhi tak teri KHushbu aa rahi hai mere bistar se

bhare ghar mein mere josh-e-junun se KHauf-e-ruswai

mujhe ifsha-e-raaz-e-ishq ka khaTka bhare ghar se

main phir aaghaz-e-ulfat ka natija sochne baiThun

mujhe tum gudguda kar phir nikal jao barabar se

mujhe to 'shad' ke har sher mein taid milti hai

kisi ru-e-munawwar se kisi zulf-e-moambar se