samaaton pe garan be-zabaniyan uski

samā.atoñ pe garāñ be-zabāniyāñ us kī

asīr-e-dair-o-haram lā-makāniyāñ us kī

har ek chehre pe be-chehragī ke saa.e haiñ

giraft meñ nahīñ ātīñ nishāniyāñ us kī

ye kis ne lahn se kaaTā hai nuur kā rishta

ki be-navā huiiñ jādū-bayāniyāñ us kī

usī kā kāsa-e-sar bhī usī kā patthar bhī

lahū usī kā lahū meñ ravāniyāñ us kī

vo sail-e-kār-e-jahāñ thā ki us ko bhuul gayā

phir aa ke mujh ko sunāo kahāniyāñ us kī

'shakeb' kartā rahā vo to ne.amateñ nāzil

hamīñ se ho na sakīñ qadr-dāniyāñ us kī

samaaton pe garan be-zabaniyan us ki

asir-e-dair-o-haram la-makaniyan us ki

har ek chehre pe be-chehragi ke sae hain

giraft mein nahin aatin nishaniyan us ki

ye kis ne lahn se kaTa hai nur ka rishta

ki be-nawa huin jadu-bayaniyan us ki

usi ka kasa-e-sar bhi usi ka patthar bhi

lahu usi ka lahu mein rawaniyan us ki

wo sail-e-kar-e-jahan tha ki us ko bhul gaya

phir aa ke mujh ko sunao kahaniyan us ki

'shakeb' karta raha wo to neamaten nazil

hamin se ho na sakin qadr-daniyan us ki