samajh ke zulm karo ai buto KHuda bhi hai

samajh ke zulm karo ai buto ḳhudā bhī hai

tumhāre jaur-o-jafā kī kuchh intihā bhī hai

agar maiñ jā.ūñgā pūchhūñgā ye masīhā se

ki mere dard-e-jigar kī koī davā bhī hai

kabhī rahā mire lab tak kabhī vahāñ pahuñchā

ye naala merā rasā aur nā-rasā bhī hai

fasāna qais kā logoñ se sun liyā hogā

ye merā qissa-e-ġham aap ne sunā bhī hai

musāfirān-e-adam aa.e do-ghaḌī ke liye

sarā-e-dahr meñ aa kar koī rahā bhī hai

tamāshā dekhiye vo ba.ad-e-qatl bhuul gayā

ki mere dar pe koī kushta-e-adā bhī hai

jafā-o-jaur se un ke to ho gayā aajiz

butoñ ke ishq kā is dil meñ hauslā bhī hai

samajh ke ḳhār-e-muġhīlāñ to sar uThā apnā

ki rahravoñ meñ ik āshiq barhana-pā bhī hai

safīna bahr-e-musībat se paar kar degā

ḳhudā samajhte ho jis ko vo nāḳhudā bhī hai

uThāo shauq se manzil meñ tum qadam apne

ki rāhzan jo hai is meñ vo rahnumā bhī hai

nazar se shaiḳh kī chhup kar chalā huuñ piine ko

'jamīla' abr hai bārish hai aur havā bhī hai

samajh ke zulm karo ai buto KHuda bhi hai

tumhaare jaur-o-jafa ki kuchh intiha bhi hai

agar main jaunga puchhunga ye masiha se

ki mere dard-e-jigar ki koi dawa bhi hai

kabhi raha mere lab tak kabhi wahan pahuncha

ye nala mera rasa aur na-rasa bhi hai

fasana qais ka logon se sun liya hoga

ye mera qissa-e-gham aap ne suna bhi hai

musafiran-e-adam aae do-ghaDi ke liye

sara-e-dahr mein aa kar koi raha bhi hai

tamasha dekhiye wo baad-e-qatl bhul gaya

ki mere dar pe koi kushta-e-ada bhi hai

jafa-o-jaur se un ke to ho gaya aajiz

buton ke ishq ka is dil mein hausla bhi hai

samajh ke KHar-e-mughilan to sar uTha apna

ki rahrawon mein ek aashiq barhana-pa bhi hai

safina bahr-e-musibat se par kar dega

KHuda samajhte ho jis ko wo naKHuda bhi hai

uThao shauq se manzil mein tum qadam apne

ki rahzan jo hai is mein wo rahnuma bhi hai

nazar se shaiKH ki chhup kar chala hun pine ko

'jamila' abr hai barish hai aur hawa bhi hai