samajh mein aa gaya hum ko ye bandagi ka mahaz

samajh meñ aa gayā ham ko ye bandagī kā mahāz

so haar jā.eñge is baar be-ḳhudī kā mahāz

ye ās-pās charāġhoñ ke phirtā parvāna

batā rahā hai ki jītūñgā raushnī kā mahāz

hamāre hoñToñ pe chhāle haiñ aur ḳhushk zabāñ

batāo ham nahīñ jīteñge tishnagī kā mahāz

bhale hī ham ne december guzār Daalā hai

abhī to sāmne aa.egā january kā mahāz

hamī ne vā'de kiye the hamī ne kaam kiye

magar vipaksh ne jiitā assembly kā mahāz

hameñ kisī kī zarūrat nahīñ jahāñ vaalo

akele jītnā hai ham ko zindagī kā mahāz

samajh mein aa gaya hum ko ye bandagi ka mahaz

so haar jaenge is bar be-KHudi ka mahaz

ye aas-pas charaghon ke phirta parwana

bata raha hai ki jitunga raushni ka mahaz

hamare honTon pe chhaale hain aur KHushk zaban

batao hum nahin jitenge tishnagi ka mahaz

bhale hi hum ne december guzar Dala hai

abhi to samne aaega january ka mahaz

hami ne wa'de kiye the hami ne kaam kiye

magar wipaksh ne jita assembly ka mahaz

hamein kisi ki zarurat nahin jahan walo

akele jitna hai hum ko zindagi ka mahaz