samajh mein kuchh nahin aata ki dil ki aarzu kya thi

samajh meñ kuchh nahīñ aatā ki dil kī aarzū kyā thī

safar to phir safar thā lekin āḳhir justujū kyā thī

bikhartī ārzūoñ kī sadā suntā to jhuum uThtā

magar pighle hue lamhāt kī ye guftugū kyā thī

larazte kāñpte pattoñ se pūchhūñ bhī to kyā pūchhūñ

judā hote hue mausam kī shān-e-rang-o-bū kyā thī

na-jāne kaun sā sūraj thā jo Duubā thā mashriq meñ

magar rah rah bikhartī raushnī sī chār-sū kyā thī

bayābāñ meñ sahar tā-shām kis ko DhūñDte the ye

parinde kis ko batlā.eñ ki un kī justujū kyā thī

na rote the na hañste the na kahte the kisī se kuchh

vo kaise log the un ke diloñ meñ aarzū kyā thī

samajh mein kuchh nahin aata ki dil ki aarzu kya thi

safar to phir safar tha lekin aaKHir justuju kya thi

bikharti aarzuon ki sada sunta to jhum uThta

magar pighle hue lamhat ki ye guftugu kya thi

larazte kanpte patton se puchhun bhi to kya puchhun

juda hote hue mausam ki shan-e-rang-o-bu kya thi

na-jaane kaun sa suraj tha jo Duba tha mashriq mein

magar rah rah bikharti raushni si chaar-su kya thi

bayaban mein sahar ta-sham kis ko DhunDte the ye

parinde kis ko batlaen ki un ki justuju kya thi

na rote the na hanste the na kahte the kisi se kuchh

wo kaise log the un ke dilon mein aarzu kya thi