samajh mein un ke aa jaegi gham ki dastan ek din

samajh meñ un ke aa jā.egī ġham kī dāstāñ ik din

mohabbat aap ho jā.egī apnī tarjumāñ ik din

unheñ kho kar nazar taskīñ kā sāmāñ aur DhūñDegī

yaqīnan phir dil-e-nākām hogā kāmrāñ ik din

jinheñ gul ḳhaar samjhe haiñ vo ik din yaad ā.eñge

matā-e-husn ko hogī talāsh-e-pāsbāñ ik din

yahāñ phir mujh sā rind-e-lā-ubālī kaun aa.egā

kamī mahsūs hogī tujh ko ai pīr-e-muġhāñ ik din

unheñ apne parā.e kī abhī pahchān mushkil hai

abhī rahne do ho jā.egā sab kā imtihāñ ik din

ravāñ hai kārvāñ manzil pe ahl-e-azm pahuñcheñge

jo kam-himmat haiñ ban jā.eñge gard-e-kārvāñ ik din

vo jān-e-ārzū mil jā.egā jis kī tamanna hai

'shifā' ye bazm-e-dil ban jā.egī rashk-e-jināñ ik din

samajh mein un ke aa jaegi gham ki dastan ek din

mohabbat aap ho jaegi apni tarjuman ek din

unhen kho kar nazar taskin ka saman aur DhunDegi

yaqinan phir dil-e-nakaam hoga kaamran ek din

jinhen gul KHar samjhe hain wo ek din yaad aaenge

mata-e-husn ko hogi talash-e-pasban ek din

yahan phir mujh sa rind-e-la-ubaali kaun aaega

kami mahsus hogi tujh ko ai pir-e-mughan ek din

unhen apne parae ki abhi pahchan mushkil hai

abhi rahne do ho jaega sab ka imtihan ek din

rawan hai karwan manzil pe ahl-e-azm pahunchenge

jo kam-himmat hain ban jaenge gard-e-karwan ek din

wo jaan-e-arzu mil jaega jis ki tamanna hai

'shifa' ye bazm-e-dil ban jaegi rashk-e-jinan ek din