samajh na pai ki kya be-mahaar chahta tha

samajh na paa.ī ki kyā be-mahār chāhtā thā

ajiib shaḳhs thā ḳhud se farār chāhtā thā

vo merī arz bhī hukman shumār karne lagā

vo har tarah se mirā e.atibār chāhtā thā

use qubūl thī vaise to merī majbūrī

magar vo mujh pe zarā iḳhtiyār chāhtā thā

javāñ diloñ ke marāhil to tai kiye saare

magar vo vasl meñ kuchh intizār chāhtā thā

tamāniyat na milī mujh ko phir kisī sūrat

ki merā dil bhī to honā figār chāhtā thā

kabhī na ashk bahāogī mujh se va.ada karo

vo pyaar meñ bhī faqat eqtidār chāhtā thā

bas ik anā thī ki jis ne Dubo diyā us ko

magar vo phir bhī usī kā hisār chāhtā thā

tamām shartoñ pe sar ko hai ḳham kiyā maiñ ne

ki ishq dard kā ik kohsār chāhtā thā

sabhī charāġh-e-mohabbat bujhā diye us ne

ki vo havā pe bhī honā savār chāhtā thā

vo thak gayā thā mohabbat kī aarzū karte

bichhaḌ ke mujh se vo shāyad qarār chāhtā thā

ye dāstāñ bhī usī shaḳhs ne likhī 'ushba'

tavīl qisse meñ jo iḳhtisār chāhtā thā

samajh na pai ki kya be-mahaar chahta tha

ajib shaKHs tha KHud se farar chahta tha

wo meri arz bhi hukman shumar karne laga

wo har tarah se mera eatibar chahta tha

use qubul thi waise to meri majburi

magar wo mujh pe zara iKHtiyar chahta tha

jawan dilon ke marahil to tai kiye sare

magar wo wasl mein kuchh intizar chahta tha

tamaniyat na mili mujh ko phir kisi surat

ki mera dil bhi to hona figar chahta tha

kabhi na ashk bahaogi mujh se wada karo

wo pyar mein bhi faqat eqtidar chahta tha

bas ek ana thi ki jis ne Dubo diya us ko

magar wo phir bhi usi ka hisar chahta tha

tamam sharton pe sar ko hai KHam kiya main ne

ki ishq dard ka ek kohsar chahta tha

sabhi charagh-e-mohabbat bujha diye us ne

ki wo hawa pe bhi hona sawar chahta tha

wo thak gaya tha mohabbat ki aarzu karte

bichhaD ke mujh se wo shayad qarar chahta tha

ye dastan bhi usi shaKHs ne likhi 'ushba'

tawil qisse mein jo iKHtisar chahta tha