samajh rahe the ki baadal hain sar pe chhae hue

samajh rahe the ki bādal haiñ sar pe chhā.e hue

magar ġhubār pe nazreñ the ham jamā.e hue

tamām raat alaao pe kāTne ke liye

sune ga.e ka.ī qisse sune-sunā.e hue

jhulas rahā hai badan dhuup kī tamāzat se

umiid sūkhe daraḳhtoñ se haiñ lagā.e hue

adā na kar sake ham qarz terī chāhat kā

tirī galī se guzarte haiñ sar jhukā.e hue

vo jin kī ḳhuun pasīne se ābyārī kī

unhīñ daraḳhtoñ ke hāsil hameñ na saa.e hue

vo kyā samajhte ujāloñ kī ahmiyat ai 'chāñd'

jinheñ charāġh mile the jale jalā.e hue

samajh rahe the ki baadal hain sar pe chhae hue

magar ghubar pe nazren the hum jamae hue

tamam raat alao pe kaTne ke liye

sune gae kai qisse sune-sunae hue

jhulas raha hai badan dhup ki tamazat se

umid sukhe daraKHton se hain lagae hue

ada na kar sake hum qarz teri chahat ka

teri gali se guzarte hain sar jhukae hue

wo jin ki KHun pasine se aabyari ki

unhin daraKHton ke hasil hamein na sae hue

wo kya samajhte ujalon ki ahmiyat ai 'chand'

jinhen charagh mile the jale jalae hue