samajh saka na koi raaz-e-husn begana

samajh sakā na koī rāz-e-husn begāna

juz iiñ niyāz-pasandī-e-qalb-e-dīvāna

ye chāñdnī ye fazā ye havā-e-mai-ḳhāna

davām ho to mile mujh ko ek paimāna

tirī nigāh kī tausīf ho rahī hai magar

mirī hī tishna-labī bhar rahī hai paimāna

jahāñ pahuñch na sakā koī jazba-e-muhtāt

vahāñ gayā hai mirā zauq-e-sarfaroshāna

nahīñ hai sarmad-o-mansūr par hī ḳhatm junūñ

mujhe bhī logoñ ne aksar kahā hai dīvāna

shikāyat-e-ġham-e-dil ko zabāñ nahīñ khultī

ki is nigāh ke andāz haiñ karīmāna

tamām bazm meñ ik ham ḳhamosh baiThe haiñ

sunā rahe haiñ sabhī tujh ko terā afsāna

yaqīn rakh ki tirī anjuman se ham bhī kabhī

tirī hī tarah se guzreñge be-niyāzāna

guzārnī hai shab-e-ġham kisī tarah ai dost

na apnī koī kahānī na koī afsāna

na pūchh mujh se kisī shai kī asl ai hamdam

ki dekhtā huuñ maiñ ābādiyoñ meñ vīrāna

ajab itāb-e-mashiyyat hai mujh pe ai 'ālī'

gadā banā ke diyā hai mizāj shāhāna

samajh saka na koi raaz-e-husn begana

juz in niyaz-pasandi-e-qalb-e-diwana

ye chandni ye faza ye hawa-e-mai-KHana

dawam ho to mile mujh ko ek paimana

teri nigah ki tausif ho rahi hai magar

meri hi tishna-labi bhar rahi hai paimana

jahan pahunch na saka koi jazba-e-muhtat

wahan gaya hai mera zauq-e-sarfaroshana

nahin hai sarmad-o-mansur par hi KHatm junun

mujhe bhi logon ne aksar kaha hai diwana

shikayat-e-gham-e-dil ko zaban nahin khulti

ki is nigah ke andaz hain karimana

tamam bazm mein ek hum KHamosh baiThe hain

suna rahe hain sabhi tujh ko tera afsana

yaqin rakh ki teri anjuman se hum bhi kabhi

teri hi tarah se guzrenge be-niyazana

guzarni hai shab-e-gham kisi tarah ai dost

na apni koi kahani na koi afsana

na puchh mujh se kisi shai ki asl ai hamdam

ki dekhta hun main aabaadiyon mein virana

ajab itab-e-mashiyyat hai mujh pe ai 'ali'

gada bana ke diya hai mizaj shahana