samajh sakte hon ahl-e-dil to ye raaz-e-nihan samjhen

samajh sakte hoñ ahl-e-dil to ye rāz-e-nihāñ samjheñ

ba-juz naqs-e-nazar parda na koī darmiyāñ samjheñ

hamārī bandagī āzād hai qaid-e-ta’ayyun se

vahīñ hai vo ḳhudā-vand-e-do-'ālam ham jahāñ samjheñ

nihāñ hote hue bhī tum 'ayāñ ho zarre-zarre se

batāo to kahāñ tum ko na samjheñ ham kahāñ samjheñ

abhī tak dast-e-gul-chīñ meñ hai gulshan kī nigahbānī

jab apnā bāġhbāñ dekheñ to apnā gulsitāñ samjheñ

chaman ke rahne vāloñ meñ kuchh aise bhī to haiñ 'akmal'

jo apne gulsitāñ ko bhī na apnā gulsitāñ samjheñ

samajh sakte hon ahl-e-dil to ye raaz-e-nihan samjhen

ba-juz naqs-e-nazar parda na koi darmiyan samjhen

hamari bandagi aazad hai qaid-e-ta’ayyun se

wahin hai wo KHuda-wand-e-do-'alam hum jahan samjhen

nihan hote hue bhi tum 'ayan ho zarre-zarre se

batao to kahan tum ko na samjhen hum kahan samjhen

abhi tak dast-e-gul-chin mein hai gulshan ki nigahbani

jab apna baghban dekhen to apna gulsitan samjhen

chaman ke rahne walon mein kuchh aise bhi to hain 'akmal'

jo apne gulsitan ko bhi na apna gulsitan samjhen