samajhta hai wo KHud ko aap ke ruKH ke muqabil ka

samajhtā hai vo ḳhud ko aap ke ruḳh ke muqābil kā

zarā insāf se kahiye ye muñh hai māh-e-kāmil kā

pata detā hai ye ruk ruk ke chalnā teġh-e-qātil kā

ki ab madd-e-nazar rah rah ke taḌpānā hai bismil kā

muāfiq hai ye in rozoñ havā gulzār-e-ālam kī

dil-e-pur-dāġh guldasta hai gul-rūyoñ kī mahfil kā

abas ai barq tujh ko naaz hai apne taḌapne par

abhī dekhā nahīñ tū ne taḌapnā muztarib dil kā

vo kyā jāneñ ġhalat kahte haiñ ḳhaal us ko jo kahte haiñ

tire ruḳh par to hai ye aks merī aañkh ke til kā

mazā aa.e agar bāham-digar haal āshkāra ho

mire dil par tire dil kā tire dil par mire dil kā

jakaḌ rakkhā hai ai haddād yād-e-zulf-e-jānāñ ne

na rakh ehsān mujh par aur tū tauq-o-salāsil kā

na ab jiite hī bantī hai na ab marte hī bantī hai

musībat aa ga.ī mere liye aanā mire dil kā

tasavvur meñ tumhāre ho ga.ī āḳhir shab-e-furqat

ḳhudā kā shukr āsānī se guzrā vaqt mushkil kā

qayāmat meñ jo honā hai vo hogā fikr kyā us kī

abhī to mujh ko ronā hai lahad kī pahlī manzil kā

mujhe shauq-e-shahādat is qadar hai us kī ulfat meñ

ki har ik se pata maiñ pūchhtā phirtā huuñ qātil kā

hasīnān-e-jahāñ kyā hī miTe haiñ merī shoḳhī par

khilaunā dil ke bahlāne ko lete haiñ mire dil kā

samajhta hai wo KHud ko aap ke ruKH ke muqabil ka

zara insaf se kahiye ye munh hai mah-e-kaamil ka

pata deta hai ye ruk ruk ke chalna tegh-e-qatil ka

ki ab madd-e-nazar rah rah ke taDpana hai bismil ka

muafiq hai ye in rozon hawa gulzar-e-alam ki

dil-e-pur-dagh guldasta hai gul-ruyon ki mahfil ka

abas ai barq tujh ko naz hai apne taDapne par

abhi dekha nahin tu ne taDapna muztarib dil ka

wo kya jaanen ghalat kahte hain KHal us ko jo kahte hain

tere ruKH par to hai ye aks meri aankh ke til ka

maza aae agar baham-digar haal aashkara ho

mere dil par tere dil ka tere dil par mere dil ka

jakaD rakkha hai ai haddad yaad-e-zulf-e-jaanan ne

na rakh ehsan mujh par aur tu tauq-o-salasil ka

na ab jite hi banti hai na ab marte hi banti hai

musibat aa gai mere liye aana mere dil ka

tasawwur mein tumhaare ho gai aaKHir shab-e-furqat

KHuda ka shukr aasani se guzra waqt mushkil ka

qayamat mein jo hona hai wo hoga fikr kya us ki

abhi to mujh ko rona hai lahad ki pahli manzil ka

mujhe shauq-e-shahadat is qadar hai us ki ulfat mein

ki har ek se pata main puchhta phirta hun qatil ka

hasinan-e-jahan kya hi miTe hain meri shoKHi par

khilauna dil ke bahlane ko lete hain mere dil ka