sameT kar tere jalwon ki raushni maine

sameT kar tire jalvoñ kī raushnī maiñ ne

dil-o-nigāh kī duniyā sañvār lī maiñ ne

mizāj-e-husn kisī taur se badal na sakā

gavārā samjhā ġham-e-nā-gavār bhī maiñ ne

tamām saḳhtiyāñ rāh-e-talab kī sahl huiiñ

tumhāre naam kī tasbīh jab paḌhī maiñ ne

tumhārā ishq huā hai ka.ī ġhamoñ kā sabab

ki ik jahāñ kī ḳharīdī hai dushmanī maiñ ne

nuqūsh-e-pā pe jabīñ ain be-ḳhudī meñ rahī

bhulā.e kab bhalā ādāb-e-āshiqī maiñ ne

ye kaun de gayā mujh ko sukūn-e-qalb-o-nazar

ye kis kā naam liyā thā abhī abhī maiñ ne

mirī hayāt-e-do-rozā kā kyā burī ki bhalī

guzārnī paḌī 'jauhar' guzār dī maiñ ne

sameT kar tere jalwon ki raushni main ne

dil-o-nigah ki duniya sanwar li main ne

mizaj-e-husn kisi taur se badal na saka

gawara samjha gham-e-na-gawar bhi main ne

tamam saKHtiyan rah-e-talab ki sahl huin

tumhaare nam ki tasbih jab paDhi main ne

tumhaara ishq hua hai kai ghamon ka sabab

ki ek jahan ki KHaridi hai dushmani main ne

nuqush-e-pa pe jabin ain be-KHudi mein rahi

bhulae kab bhala aadab-e-ashiqi main ne

ye kaun de gaya mujh ko sukun-e-qalb-o-nazar

ye kis ka nam liya tha abhi abhi main ne

meri hayat-e-do-roza ka kya buri ki bhali

guzarni paDi 'jauhar' guzar di main ne