sameT kar teri yaadon ke phul daman mein

sameT kar tirī yādoñ ke phuul dāman meñ

basā rahā huuñ bahāroñ ko dil ke gulshan meñ

abhī ziyā-e-tasavvur se aañkh raushan hai

abhī bahār-e-charāġhāñ hai dil ke āñgan meñ

tire baġhair hai be-rañg raunaq-e-gulshan

ye aur baat ki khulte haiñ phuul gulshan meñ

ghaTāoñ se to barastī hoñ bijliyāñ jaise

kahāñ se ā.eñgī ThanDī havā.eñ sāvan meñ

chhupā diyā mirī nazroñ se ḳhud mujhe us ne

utar ga.ī hai jo tasvīr dil ke darpan meñ

kahīñ nazar meñ nahīñ duur duur tak sāhil

bhañvar kī naav ke mānind jaan hai tan meñ

qarīb-e-dil bhī haiñ vo duur bhī haiñ nazroñ se

kuchh apne-pan kī jhalak bhī hai ajnabī-pan meñ

rukī rukī sī hai raftār-e-zindagī jaise

hazār ḳhuun ragoñ meñ hai jaan hai tan meñ

baras paḌe mirī āñkhoñ se yak-ba-yak aañsū

kisī kī yaad jab aa.ī baraste sāvan meñ

pata nahīñ hai 'rishī' duur duur manzil kā

kidhar ko jaa.eñ hameñ raat ho ga.ī ban meñ

sameT kar teri yaadon ke phul daman mein

basa raha hun bahaaron ko dil ke gulshan mein

abhi ziya-e-tasawwur se aankh raushan hai

abhi bahaar-e-charaghan hai dil ke aangan mein

tere baghair hai be-rang raunaq-e-gulshan

ye aur baat ki khulte hain phul gulshan mein

ghaTaon se to barasti hon bijliyan jaise

kahan se aaengi ThanDi hawaen sawan mein

chhupa diya meri nazron se KHud mujhe us ne

utar gai hai jo taswir dil ke darpan mein

kahin nazar mein nahin dur dur tak sahil

bhanwar ki naw ke manind jaan hai tan mein

qarib-e-dil bhi hain wo dur bhi hain nazron se

kuchh apne-pan ki jhalak bhi hai ajnabi-pan mein

ruki ruki si hai raftar-e-zindagi jaise

hazar KHun ragon mein hai jaan hai tan mein

baras paDe meri aankhon se yak-ba-yak aansu

kisi ki yaad jab aai baraste sawan mein

pata nahin hai 'rishi' dur dur manzil ka

kidhar ko jaen hamein raat ho gai ban mein