samjhae koi ye baat zara kyon gham ko masarrat kahte hain

samjhā.e koī ye baat zarā kyoñ ġham ko masarrat kahte haiñ

barbād kiyā hai jis ne hameñ sab us ko mohabbat kahte haiñ

barsoñ bhī nahīñ khultī hai zabāñ duniyā se shikāyat kyā karte

jab dard sivā ho jaatā hai rūdād-e-aziyyat kahte haiñ

insāf to kar le kuchh dil meñ kyā yahī vafā kā badla hai

har roz sitam har vaqt jafā kyā is ko rifāqat kahte haiñ

ādāb-e-mohabbat ke sadqe īmān-e-vafā ke saa.e meñ

kuchh 'ishq ne aisā dars diyā taklīf ko rāhat kahte haiñ

ye 'ishq-o-junūñ kā saudā hai rakhnā hai ise ab dil meñ nihāñ

har ġham ko masarrat samjho 'ḳhizr' har dard ko rāhat kahte haiñ

samjhae koi ye baat zara kyon gham ko masarrat kahte hain

barbaad kiya hai jis ne hamein sab us ko mohabbat kahte hain

barson bhi nahin khulti hai zaban duniya se shikayat kya karte

jab dard siwa ho jata hai rudad-e-aziyyat kahte hain

insaf to kar le kuchh dil mein kya yahi wafa ka badla hai

har roz sitam har waqt jafa kya is ko rifaqat kahte hain

aadab-e-mohabbat ke sadqe iman-e-wafa ke sae mein

kuchh 'ishq ne aisa dars diya taklif ko rahat kahte hain

ye 'ishq-o-junun ka sauda hai rakhna hai ise ab dil mein nihan

har gham ko masarrat samjho 'KHizr' har dard ko rahat kahte hain