samundar se gham-o-ghussa ke tughyani nahin jati

samundar se ġham-o-ġhussa ke tuġhyānī nahīñ jaatī

shikāyat chiiz aisī hai ba-āsānī nahīñ jaatī

nigāhoñ ne na jaane us kī dekhe kaun se manzar

bahut chāhā pe āñkhoñ se ye vīrānī nahīñ jaatī

taḳhayyul dastakeñ de kar palaT jaatā hai aksar hī

anā kī jazba-e-dil par nigahbānī nahīñ jaatī

bahut mumkin hai ḳhat kā bhī tire mazmūñ badal jaa.e

abhī to bas likhāvaT hai jo pahchānī nahīñ jaatī

dil-e-be-sabr aksar ārzūoñ par machaltā hai

magar us kī kabhī ik baat bhī maanī nahīñ jaatī

koī sach ko jo kah de sach to bhārī hai tabī'at par

ki hai sunñe kī 'ādat zill-e-sub.hānī nahīñ jaatī

nahīñ de paa.e ham pur-amn mulk-o-qaum bachchoñ ko

yaqīñ maano na maano ye pashemānī nahīñ jaatī

samundar se gham-o-ghussa ke tughyani nahin jati

shikayat chiz aisi hai ba-asani nahin jati

nigahon ne na jaane us ki dekhe kaun se manzar

bahut chaha pe aankhon se ye virani nahin jati

taKHayyul dastaken de kar palaT jata hai aksar hi

ana ki jazba-e-dil par nigahbani nahin jati

bahut mumkin hai KHat ka bhi tere mazmun badal jae

abhi to bas likhawaT hai jo pahchani nahin jati

dil-e-be-sabr aksar aarzuon par machalta hai

magar us ki kabhi ek baat bhi mani nahin jati

koi sach ko jo kah de sach to bhaari hai tabi'at par

ki hai sunne ki 'adat zill-e-subhani nahin jati

nahin de pae hum pur-amn mulk-o-qaum bachchon ko

yaqin mano na mano ye pashemani nahin jati