samundar se kisi lamhe bhi tughyani nahin jati

samundar se kisī lamhe bhī tuġhyānī nahīñ jaatī

magar sāhil ko ġham hai ḳhushk-dāmānī nahīñ jaatī

ġhanīmat hai mirī āñkhoñ kī ye sayyāl ātish bhī

isī se mere zehn-o-dil kī tābānī nahīñ jaatī

savā-neze pe sūraj der tak rukne nahīñ paatā

magar kyā hai ki terī sho.ala-afshānī nahīñ jaatī

sadā-e-ḳhāmushī detī hai ab dastak dar-e-dil par

na jaane kyuuñ hamāre ghar se vīrānī nahīñ jaatī

rihā ho kar bhī kuchh taa.ir qafas meñ lauT aate haiñ

fazā-e-qaid kī aadat ba-āsānī nahīñ jaatī

tamaddun kā nayā jaama bahut shaffāf hai yaaro

ki tan-poshī karo kitnī hī uryānī nahīñ jaatī

jatan saare hī kartā huuñ magar kyā kījiye 'arshad'

mirī ḳhuddāri-e-fitrat hai dīvānī nahīñ jaatī

samundar se kisi lamhe bhi tughyani nahin jati

magar sahil ko gham hai KHushk-damani nahin jati

ghanimat hai meri aankhon ki ye sayyal aatish bhi

isi se mere zehn-o-dil ki tabani nahin jati

sawa-neze pe suraj der tak rukne nahin pata

magar kya hai ki teri shoala-afshani nahin jati

sada-e-KHamushi deti hai ab dastak dar-e-dil par

na jaane kyun hamare ghar se virani nahin jati

riha ho kar bhi kuchh tair qafas mein lauT aate hain

faza-e-qaid ki aadat ba-asani nahin jati

tamaddun ka naya jama bahut shaffaf hai yaro

ki tan-poshi karo kitni hi uryani nahin jati

jatan sare hi karta hun magar kya kijiye 'arshad'

meri KHuddari-e-fitrat hai diwani nahin jati