samundaron ke safar mein nadi ki pyas bujhe

samundaroñ ke safar meñ nadī kī pyaas bujhe

hamāre ḳhuun se shāyad kisī kī pyaas bujhe

na jaane kitne ujāloñ ko pī chukī lekin

na jaane kab mirī tīra-shabī kī pyaas bujhe

mirā sukūt bhī āvāz kā samundar hai

jo ik nazar mujhe chhū le usī kī pyaas bujhe

matā'-e-soz-e-nihāñ aur baḳhsh de mujh ko

kisī tarah tirī dariyā-dilī kī pyaas bujhe

savād-e-manzil-e-jānāñ ki kūcha-e-qātil

kahīñ to jā ke ġham-e-zindagī kī pyaas bujhe

nasīb-e-ahl-e-nazar hai safar sarāboñ kā

na bujh sakī na kabhī jiite jī kī pyaas bujhe

vo tere gaañv kā panghaT thā merā shahr nahīñ

ki lū chale to kisī ajnabī kī pyaas bujhe

pighal bhī jaa.e jo ye barf us ke chehre kī

yaqīñ nahīñ mirī be-chehragī kī pyaas bujhe

baraste tīroñ kī bārish meñ ham haiñ sīna-kushā

yahī vo rut hai ki dil kī lagī kī pyaas bujhe

mile na jaane kahāñ 'badr' chashma-e-zulmāt

ḳhabar nahīñ ki kahāñ shab-ravī kī pyaas bujhe

samundaron ke safar mein nadi ki pyas bujhe

hamare KHun se shayad kisi ki pyas bujhe

na jaane kitne ujalon ko pi chuki lekin

na jaane kab meri tira-shabi ki pyas bujhe

mera sukut bhi aawaz ka samundar hai

jo ek nazar mujhe chhu le usi ki pyas bujhe

mata'-e-soz-e-nihan aur baKHsh de mujh ko

kisi tarah teri dariya-dili ki pyas bujhe

sawad-e-manzil-e-jaanan ki kucha-e-qatil

kahin to ja ke gham-e-zindagi ki pyas bujhe

nasib-e-ahl-e-nazar hai safar sarabon ka

na bujh saki na kabhi jite ji ki pyas bujhe

wo tere ganw ka panghaT tha mera shahr nahin

ki lu chale to kisi ajnabi ki pyas bujhe

pighal bhi jae jo ye barf us ke chehre ki

yaqin nahin meri be-chehragi ki pyas bujhe

baraste tiron ki barish mein hum hain sina-kusha

yahi wo rut hai ki dil ki lagi ki pyas bujhe

mile na jaane kahan 'badr' chashma-e-zulmat

KHabar nahin ki kahan shab-rawi ki pyas bujhe