samundaron ke sukun ko bhanwar ne chhin liya

samundaroñ ke sukūñ ko bhañvar ne chhīn liyā

kisī ke chain ko us ke hī ghar ne chhīn liyā

sañbhalne vaalī nahīñ hai ye tez-rau duniyā

purāne rog ko taaza ḳhabar ne chhīn liyā

mujhe to bas yahī dukh hai ki mere gulshan kī

tarang-o-rang ko sūkhe shajar ne chhīn liyā

purāne khel na.e kheloñ se judā the miyāñ

vo phurtiyāñ thiiñ jinheñ daur-e-zar ne chhīn liyā

kisī kā sar koī dastār kar ga.ī aġhvā

kisī ke taaj ko duuje ke sar ne chhīn liyā

burā.iyāñ na likheñ to farishte kyā kareñ 'aun'

ḳhilāfatoñ ko jo ilm-e-bashar ne chhīn liyā

samundaron ke sukun ko bhanwar ne chhin liya

kisi ke chain ko us ke hi ghar ne chhin liya

sanbhalne wali nahin hai ye tez-rau duniya

purane rog ko taza KHabar ne chhin liya

mujhe to bas yahi dukh hai ki mere gulshan ki

tarang-o-rang ko sukhe shajar ne chhin liya

purane khel nae khelon se juda the miyan

wo phurtiyan thin jinhen daur-e-zar ne chhin liya

kisi ka sar koi dastar kar gai aghwa

kisi ke taj ko duje ke sar ne chhin liya

buraiyan na likhen to farishte kya karen 'aun'

KHilafaton ko jo ilm-e-bashar ne chhin liya