samundaron ki tarah be-kanar hone ki

samundaroñ kī tarah be-kanār hone kī

kahīñ to rasm chale be-shumār hone kī

har ek shaḳhs kī ḳhvāhish qadam rakhe mujh par

sazā milī hai tirī rahguzār hone kī

maiñ dāstān-e-alamnāk kah nahīñ saktā

ye ruuh dāḳhil-e-musht-e-ġhubār hone kī

kisī bhī rut meñ yahāñ phuul ab nahīñ khilte

yahī sabab hai garebāñ ke taar hone kī

maiñ vo ghaḌī bhī tumhāre nisār kar aaya

jo ik ghaḌī thī hamāre shumār hone kī

zamīñ pe halqa-e-lail-o-nahār hai qaa.em

nishānī hai ye tire intizār hone kī

ye kār-zār-e-jahāñ meñ jo zindagī hai 'ḳhizar'

ye dāstāñ hai ḳhudā se farār hone kī

samundaron ki tarah be-kanar hone ki

kahin to rasm chale be-shumar hone ki

har ek shaKHs ki KHwahish qadam rakhe mujh par

saza mili hai teri rahguzar hone ki

main dastan-e-alamnak kah nahin sakta

ye ruh daKHil-e-musht-e-ghubar hone ki

kisi bhi rut mein yahan phul ab nahin khilte

yahi sabab hai gareban ke tar hone ki

main wo ghaDi bhi tumhaare nisar kar aaya

jo ek ghaDi thi hamare shumar hone ki

zamin pe halqa-e-lail-o-nahaar hai qaem

nishani hai ye tere intizar hone ki

ye kar-zar-e-jahan mein jo zindagi hai 'KHizar'

ye dastan hai KHuda se farar hone ki