san’at-e-kirdgar hain hum log

san’at-e-kirdgār haiñ ham log

'azmat-e-shāhkār haiñ ham log

shaukat-e-yādgār haiñ ham log

bā'is-e-iftiḳhār haiñ ham log

sulh-jū sulh-kār haiñ ham log

gulsitāñ kī bahār haiñ ham log

jab se sīna-figār haiñ ham log

paikar-e-iztirār haiñ ham log

dil pe qaabū na tum pe qaabū hai

kitne be-iḳhtiyār haiñ ham log

tere bhī ho ke terī duniyā meñ

bā’is-e-nang-o-‘ār haiñ ham log

'ishq kā kārobār karte haiñ

barsar-e-rozgār haiñ ham log

haiñ chaman meñ guloñ ke hamsā.e

aur nigāhoñ meñ ḳhaar haiñ ham log

haiñ lagā.e hue gale ab bhī

dostī kā vaqār haiñ ham log

kitne vaznī haiñ pā-e-istidrāk

dosh-e-gītī pe baar haiñ ham log

jānte haiñ vajūh-e-buġhz-o-‘inād

kyoñ mohabbat-shi’ār haiñ ham log

ġham bachā kar diloñ meñ rakhte haiñ

kyā kifāyat-shi’ār haiñ ham log

bahr-e-ulfat kī tah meñ pāoge

gauhar-e-āb-dār haiñ ham log

'zākir' urdu zabāñ hamārī hai

is ke āmozgār haiñ ham log

san’at-e-kirdgar hain hum log

'azmat-e-shahkar hain hum log

shaukat-e-yaadgar hain hum log

ba'is-e-iftiKHar hain hum log

sulh-ju sulh-kar hain hum log

gulsitan ki bahaar hain hum log

jab se sina-figar hain hum log

paikar-e-iztirar hain hum log

dil pe qabu na tum pe qabu hai

kitne be-iKHtiyar hain hum log

tere bhi ho ke teri duniya mein

ba’is-e-nang-o-‘ar hain hum log

'ishq ka karobar karte hain

barsar-e-rozgar hain hum log

hain chaman mein gulon ke hamsae

aur nigahon mein KHar hain hum log

hain lagae hue gale ab bhi

dosti ka waqar hain hum log

kitne wazni hain pa-e-istidrak

dosh-e-giti pe bar hain hum log

jaante hain wajuh-e-bughz-o-‘inad

kyon mohabbat-shi’ar hain hum log

gham bacha kar dilon mein rakhte hain

kya kifayat-shi’ar hain hum log

bahr-e-ulfat ki tah mein paoge

gauhar-e-ab-dar hain hum log

'zakir' urdu zaban hamari hai

is ke aamozgar hain hum log