san kar bayan-e-dard kaleja dahal na jae

san kar bayān-e-dard kaleja dahal na jaa.e

duniyā se Dar rahe the ki duniyā badal na jaa.e

har mahfil-e-nashāt se phirtā huuñ duur duur

kyā ehtiyāt hai ki tirā ġham bahal na jaa.e

to aaj tak to hai mirī nazroñ meñ hū-ba-hū

duniyā badal ga.ī tirī sūrat badal na jaa.e

haiñ tāq-e-ārzū pe khilaune saje hue

māyūs aarzū kī tabī.at machal na jaa.e

tishna-labī kahīñ mujhe ġharqāb kar na de

thoḌī sī raushnī ke liye ghar hī jal na jaa.e

ik ḳhauf hai ki manzil-e-nisyāñ qarīb hai

tū vādī-e-ḳhayāl se aage nikal na jaa.e

ro.uuñ kahāñ ki rāhat-e-ḳhalvat nahīñ hai 'shāz'

hañsne pe bhī ye shart ki aañsū nikal na jaa.e

san kar bayan-e-dard kaleja dahal na jae

duniya se Dar rahe the ki duniya badal na jae

har mahfil-e-nashat se phirta hun dur dur

kya ehtiyat hai ki tera gham bahal na jae

to aaj tak to hai meri nazron mein hu-ba-hu

duniya badal gai teri surat badal na jae

hain taq-e-arzu pe khilaune saje hue

mayus aarzu ki tabiat machal na jae

tishna-labi kahin mujhe gharqab kar na de

thoDi si raushni ke liye ghar hi jal na jae

ek KHauf hai ki manzil-e-nisyan qarib hai

tu wadi-e-KHayal se aage nikal na jae

roun kahan ki rahat-e-KHalwat nahin hai 'shaz'

hansne pe bhi ye shart ki aansu nikal na jae