sanam-kada mein haram mein sharab-KHane mein

sanam-kada meñ haram meñ sharāb-ḳhāne meñ

hameñ mile tire jalve har āstāne meñ

ye jazb-e-ḳhās na dekhā kahīñ zamāne meñ

girī to Duub ga.ī barq āshiyāne meñ

jo āftāb se mansūb hai zamāne meñ

usī ko kahte haiñ sāġhar sharāb-ḳhāne meñ

maiñ sajda-rez rahā be-ḳhudī meñ har dar par

jabīn-e-shauq rahī un ke āstāne meñ

chaman kī ruuh mirī zindagī kā hāsil the

vo chaar tinke jo the mere āshiyāne meñ

ye DeḌh iiñT kī masjid nahīñ hai ai vaa.iz

hayāt ḳhizr se le mai-kada banāne meñ

jilā milī hai mire dil ko un ke jalvoñ se

vo ḳhud sharīk the ye aa.ina banāne meñ

nahīñ hai haq use un ke naqāb ulaTne kā

bahak gayā ho jo pī kar sharāb-ḳhāne meñ

taḌap ke barq girī us pe is tarah goyā

bahut baḌī koī daulat hai āshiyāne meñ

mirā ḳhayāl mirā sajda merā zauq-e-talab

jo aa gayā vo rahā tere āstāne meñ

nafas nafas meñ vahī jalva-gar nazar aa.e

'vakīl' DhūñDh rahā thā jinheñ zamāne meñ

sanam-kada mein haram mein sharab-KHane mein

hamein mile tere jalwe har aastane mein

ye jazb-e-KHas na dekha kahin zamane mein

giri to Dub gai barq aashiyane mein

jo aaftab se mansub hai zamane mein

usi ko kahte hain saghar sharab-KHane mein

main sajda-rez raha be-KHudi mein har dar par

jabin-e-shauq rahi un ke aastane mein

chaman ki ruh meri zindagi ka hasil the

wo chaar tinke jo the mere aashiyane mein

ye DeDh inT ki masjid nahin hai ai waiz

hayat KHizr se le mai-kada banane mein

jila mili hai mere dil ko un ke jalwon se

wo KHud sharik the ye aaina banane mein

nahin hai haq use un ke naqab ulaTne ka

bahak gaya ho jo pi kar sharab-KHane mein

taDap ke barq giri us pe is tarah goya

bahut baDi koi daulat hai aashiyane mein

mera KHayal mera sajda mera zauq-e-talab

jo aa gaya wo raha tere aastane mein

nafas nafas mein wahi jalwa-gar nazar aae

'wakil' DhunDh raha tha jinhen zamane mein