sanam ke sanam the patthar hamari tab-e-nazar se pahle

sanam ke sanam the patthar hamārī tāb-e-nazar se pahle

jabīñ meñ sajde taḌap rahe the na jaane kyuuñ sañg-e-dar se pahle

tū rāhzan to nahīñ hai pūchhūñ maiñ kis tarah ham-safar se pahle

savāl aisā kiyā nahīñ hai kisī ne bhī rāhbar se pahle

ajiib rāh-e-adam hai par ḳhatm har ek raahī ko hai yahī ġham

ye raaz khultā nahīñ kisī par jahāñ meñ azm-e-safar se pahle

ye tiir aisā lagā hai dil par ki dil maza us kā jāntā hai

maiñ lazzat-e-ġham se be-ḳhabar thā tumhārī tirchhī nazar se pahle

ye aarzū hai rahe vo qaa.em ki chārasāzī kā ab nahīñ ġham

ḳhalish jo mahsūs kar rahā thā jigar maiñ dard-e-jigar se pahle

ye aadmī hī binā-e-shar hai jo apnī hastī se be-ḳhabar hai

gunāh kā naam tak kahāñ thā vajūd-e-nau-e-bashar se pahle

maiñ zulmatoñ meñ bhī dekhtā thā siyāh-baḳhtī kā apnī aalam

mirī nazar-e-motabar kahāñ thī drūd-e-shms-o-qamar se pahle

sanam ke sanam the patthar hamari tab-e-nazar se pahle

jabin mein sajde taDap rahe the na jaane kyun sang-e-dar se pahle

tu rahzan to nahin hai puchhun main kis tarah ham-safar se pahle

sawal aisa kiya nahin hai kisi ne bhi rahbar se pahle

ajib rah-e-adam hai par KHatm har ek rahi ko hai yahi gham

ye raaz khulta nahin kisi par jahan mein azm-e-safar se pahle

ye tir aisa laga hai dil par ki dil maza us ka jaanta hai

main lazzat-e-gham se be-KHabar tha tumhaari tirchhi nazar se pahle

ye aarzu hai rahe wo qaem ki chaarasazi ka ab nahin gham

KHalish jo mahsus kar raha tha jigar main dard-e-jigar se pahle

ye aadmi hi bina-e-shar hai jo apni hasti se be-KHabar hai

gunah ka nam tak kahan tha wajud-e-nau-e-bashar se pahle

main zulmaton mein bhi dekhta tha siyah-baKHti ka apni aalam

meri nazar-e-motabar kahan thi drud-e-shms-o-qamar se pahle