sang aata hai koi jab mere sar ki jaanib

sañg aatā hai koī jab mire sar kī jānib

dekh letā huuñ samar-bār shajar kī jānib

is masāfat kā koī ant nahīñ hai lekin

din nikalte hī maiñ chal paḌtā huuñ ghar kī jānib

kis ne āvāz mujhe sāhil-e-jāñ se dī hai

naav kyuuñ dil kī lapaktī hai bhañvar kī jānib

qissa-e-shauq ko us tishna-labī kā likhnā

kar ke ik aur safar shahr-e-hunar kī jānib

phir se añgāroñ kā mausam mire andar utrā

phir baḌhā haath mirā la.al-o-gohar kī jānib

ye jo hai sūrat-e-hālāt badal saktī hai

kaash kar paañv safar ḳhair se shar kī jānib

ain mumkin hai ki pathrātā na koī 'azmī'

tū ne dekhā hī nahīñ muḌ ke nagar kī jānib

sang aata hai koi jab mere sar ki jaanib

dekh leta hun samar-bar shajar ki jaanib

is masafat ka koi ant nahin hai lekin

din nikalte hi main chal paDta hun ghar ki jaanib

kis ne aawaz mujhe sahil-e-jaan se di hai

naw kyun dil ki lapakti hai bhanwar ki jaanib

qissa-e-shauq ko us tishna-labi ka likhna

kar ke ek aur safar shahr-e-hunar ki jaanib

phir se angaron ka mausam mere andar utra

phir baDha hath mera lal-o-gohar ki jaanib

ye jo hai surat-e-haalat badal sakti hai

kash kar panw safar KHair se shar ki jaanib

ain mumkin hai ki pathraata na koi 'azmi'

tu ne dekha hi nahin muD ke nagar ki jaanib