sang aur KHisht-e-malamat se bacha lo mujhko

sañg aur ḳhisht-e-malāmat se bachā lo mujh ko

apne darbār kī dīvār banā lo mujh ko

pāra-pāra ho anā aur sar-e-maġhrūr fanā

geñd kī tarah fazāoñ meñ uchhālo mujh ko

luqma-e-tar ne mire nafs ko barbād kiyā

yaad karte raho kankar ke nivālo mujh ko

jaane kis qabr kā hai paikar-e-ḳhālī merā

maiñ khilaunā huuñ to bas toḌ hī Daalo mujh ko

dasht-e-pur-ḳhār meñ huuñ ik shajar-e-ḳhām abhī

apnī dahlīz kā taḳhta hī banā lo mujh ko

ik nazar ek nazar ek nazar ek nazar

sirf duzdīda-nazar Daal ke Taalo mujh ko

'kāvisham' kyā hai samajh meñ kabhī aa jā.egā

ġham-zada giit samajh kar kabhī gā lo mujh ko

sang aur KHisht-e-malamat se bacha lo mujh ko

apne darbar ki diwar bana lo mujh ko

para-para ho ana aur sar-e-maghrur fana

gend ki tarah fazaon mein uchhaalo mujh ko

luqma-e-tar ne mere nafs ko barbaad kiya

yaad karte raho kankar ke niwalo mujh ko

jaane kis qabr ka hai paikar-e-KHali mera

main khilauna hun to bas toD hi Dalo mujh ko

dasht-e-pur-KHar mein hun ek shajar-e-KHam abhi

apni dahliz ka taKHta hi bana lo mujh ko

ek nazar ek nazar ek nazar ek nazar

sirf duzdida-nazar Dal ke Talo mujh ko

'kawisham' kya hai samajh mein kabhi aa jaega

gham-zada git samajh kar kabhi ga lo mujh ko