sang-e-malamat paiham barse aur ruswa din raat hue

sang-e-malāmat paiham barse aur rusvā din raat hue

aap kī nagrī meñ ham aa kar kitne kam-auqāt hue

yūrish-e-ġham se kaif-o-nashāt-e-hastī-e-dil pāmāl rahe

nauhe ban ga.e sher ġhazal ke āh-o-fuġhāñ naġhmāt hue

jin se ahd-e-vafā thā apnā jin se dil ke rishte the

merā patā vo mujh se pūchheñ aise bhī hālāt hue

ahd-e-nā-pursāñ meñ hamāre jism-o-jāñ kī qīmat kyā

qarya qarya ham ko bāñTā ham goyā ḳhairāt hue

apnī tabī.at saada saada makr-o-daġhā se nā-mānūs

jis ne hañs kar baat kī ham se ham bas us ke saath hue

ham se thī tanvīr-e-gulistāñ ham se thī taz.īn-e-chaman

ahl-e-chaman meñ lekin rusvā gul-chīnoñ ke haath hue

pahle maa.eñ lorī de kar mīThī niiñd sulātī thiiñ

ab kahtī haiñ so jā varna chor aate haiñ raat hue

un kā bhī kuchh haal sunāo un kā bhī kuchh zikr karo

ek zamāna biit gayā hai jin se hamārī baat hue

roz-e-azal se bichhḌe hue ho āḳhir kab tum aaoge

sub.h savere jaane vaale lauT aate haiñ raat hue

sang-e-malamat paiham barse aur ruswa din raat hue

aap ki nagri mein hum aa kar kitne kam-auqat hue

yurish-e-gham se kaif-o-nashat-e-hasti-e-dil pamal rahe

nauhe ban gae sher ghazal ke aah-o-fughan naghmat hue

jin se ahd-e-wafa tha apna jin se dil ke rishte the

mera pata wo mujh se puchhen aise bhi haalat hue

ahd-e-na-pursan mein hamare jism-o-jaan ki qimat kya

qarya qarya hum ko banTa hum goya KHairaat hue

apni tabiat sada sada makr-o-dagha se na-manus

jis ne hans kar baat ki hum se hum bas us ke sath hue

hum se thi tanwir-e-gulistan hum se thi tazin-e-chaman

ahl-e-chaman mein lekin ruswa gul-chinon ke hath hue

pahle maen lori de kar miThi nind sulati thin

ab kahti hain so ja warna chor aate hain raat hue

un ka bhi kuchh haal sunao un ka bhi kuchh zikr karo

ek zamana bit gaya hai jin se hamari baat hue

roz-e-azal se bichhDe hue ho aaKHir kab tum aaoge

subh sawere jaane wale lauT aate hain raat hue