sang mein ruh ka imkan bhi ho sakta hai

sang meñ ruuh kā imkān bhī ho saktā hai

vo jo but hai vo mirī jaan bhī ho saktā hai

kyā zarūrī hai mahaktā ho faqat us kā badan

ghar meñ rakkhā huā guldān bhī ho saktā hai

ye jo chāhat hai 'adāvat meñ badal saktī hai

ye jo tohfa hai kal ehsān bhī ho saktā hai

ab bhī aa saktā hai vo chāñd nazar dhyān rahe

nisf shab 'iid kā e'lān bhī ho saktā hai

phir tire baa'd hasīñ chehre ko dekhā to lagā

'ishq to hijr ke daurān bhī ho saktā hai

raah meñ 'ishq kī mā'lūm hai 'sayyad-ahmad’

jaan kā maal kā nuqsān bhī ho saktā hai

sang mein ruh ka imkan bhi ho sakta hai

wo jo but hai wo meri jaan bhi ho sakta hai

kya zaruri hai mahakta ho faqat us ka badan

ghar mein rakkha hua guldan bhi ho sakta hai

ye jo chahat hai 'adawat mein badal sakti hai

ye jo tohfa hai kal ehsan bhi ho sakta hai

ab bhi aa sakta hai wo chand nazar dhyan rahe

nisf shab 'id ka e'lan bhi ho sakta hai

phir tere ba'd hasin chehre ko dekha to laga

'ishq to hijr ke dauran bhi ho sakta hai

rah mein 'ishq ki ma'lum hai 'sayyad-ahmad’

jaan ka mal ka nuqsan bhi ho sakta hai