sang-o-shisha dar-o-diwar ke chehre dekhe

sang-o-shīsha dar-o-dīvār ke chehre dekhe

ham ne aksar rasan-o-dār ke chehre dekhe

ḳhud hathelī pe uThā.e hue apne sar ko

sar pe laTkī huī talvār ke chehre dekhe

apne be-chehra tabassum ko muqayyad kar ke

ham ne yūsuf ke ḳharīdār ke chehre dekhe

qatl ḳhud ko ka.ī qistoñ meñ kiyā hai ham ne

qātiloñ meñ bhī agar pyaar ke chehre dekhe

ham ne yādoñ ke dorāhe pe sadā meñ ghir kar

kabhī dushman kabhī ġham-ḳhvār ke chehre dekhe

tishnagī lab pe sameTe hue sahrā kī tarah

ham ne sāqī-e-tarahdār ke chehre dekhe

āftāboñ se bhare shahr meñ kajlā.e hue

ham ne phir sub.h ke āsār ke chehre dekhe

saade aurāq pe bikhrā ke ḳhud apnā hī vajūd

ham ne apne dil-e-be-kār ke chehre dekhe

sang-o-shisha dar-o-diwar ke chehre dekhe

hum ne aksar rasan-o-dar ke chehre dekhe

KHud hatheli pe uThae hue apne sar ko

sar pe laTki hui talwar ke chehre dekhe

apne be-chehra tabassum ko muqayyad kar ke

hum ne yusuf ke KHaridar ke chehre dekhe

qatl KHud ko kai qiston mein kiya hai hum ne

qatilon mein bhi agar pyar ke chehre dekhe

hum ne yaadon ke dorahe pe sada mein ghir kar

kabhi dushman kabhi gham-KHwar ke chehre dekhe

tishnagi lab pe sameTe hue sahra ki tarah

hum ne saqi-e-tarahdar ke chehre dekhe

aaftabon se bhare shahr mein kajlae hue

hum ne phir subh ke aasar ke chehre dekhe

sade auraq pe bikhra ke KHud apna hi wajud

hum ne apne dil-e-be-kar ke chehre dekhe