sang par phul khilane ka hunar aata hai

sang par phuul khilāne kā hunar aatā hai

mujh ko ehsās jagāne kā hunar aatā hai

aa.ine mujh se ḳhafā rahte haiñ kyūñki mujh ko

sher meñ shakl dikhāne kā hunar aatā hai

kaun hai koī nahīñ rab ke alāva jis ko

aag ko phuul banāne kā hunar aatā hai

aañkh ko ḳhvāb dikhā.eñ sabhī lekin mujh ko

ḳhvāb ko ḳhvāb dikhāne kā hunar aatā hai

is tavassut se bhī pariyāñ mujhe pahchāntī haiñ

chāñd par rang jamāne kā hunar aatā hai

aañkh ke paar mire dekh nahīñ saktā koī

dard-e-dil mujh ko chhupāne kā hunar aatā hai

ye hunar mujh ko virāsat meñ milā purkhoñ se

dasht meñ ḳhaak uḌāne kā hunar aatā hai

maiñ samundar nahīñ ik abr huuñ 'shādāb' jise

dasht kī pyaas bujhāne kā hunar aatā hai

sang par phul khilane ka hunar aata hai

mujh ko ehsas jagane ka hunar aata hai

aaine mujh se KHafa rahte hain kyunki mujh ko

sher mein shakl dikhane ka hunar aata hai

kaun hai koi nahin rab ke alawa jis ko

aag ko phul banane ka hunar aata hai

aankh ko KHwab dikhaen sabhi lekin mujh ko

KHwab ko KHwab dikhane ka hunar aata hai

is tawassut se bhi pariyan mujhe pahchanti hain

chand par rang jamane ka hunar aata hai

aankh ke par mere dekh nahin sakta koi

dard-e-dil mujh ko chhupane ka hunar aata hai

ye hunar mujh ko wirasat mein mila purkhon se

dasht mein KHak uDane ka hunar aata hai

main samundar nahin ek abr hun 'shadab' jise

dasht ki pyas bujhane ka hunar aata hai