sang-zanon ke waste phir nae raston mein hai

sañg-zanoñ ke vāste phir na.e rāstoñ meñ hai

vahshat-e-jāñ kā mas.ala shīshe ke jañgaloñ meñ hai

utrī thiiñ dasht par kabhī barg-o-samar vo āhaTeñ

qaht-e-sadā-e-dostāñ phir se samā.atoñ meñ hai

jin meñ nihāñ rahā kabhī nik.hat-o-gul kī qurbateñ

had-e-zamīn-o-āsmāñ ab inhī rābtoñ meñ hai

kisī ne zamīñ ke jism se fasl-e-visāl chhīn lī

arsa-e-hashr sā bapā ruuh kī khetiyoñ meñ hai

dil se lahū ke shor tak zaḳhm kā silsila ravāñ

shorish-e-bahr-e-be-karāñ aaj se phir ragoñ meñ hai

ālam-e-be-hijābī-e-jāñ kā samāñ kuchh aur thā

har bun-e-mū kā harf-e-dil yuuñ to khulā laboñ meñ hai

taare se samt bhī alag naav se raah bhī judā

ramz-e-musāfirat chhupā chup ke samundaroñ meñ hai

sang-zanon ke waste phir nae raston mein hai

wahshat-e-jaan ka masala shishe ke jangalon mein hai

utri thin dasht par kabhi barg-o-samar wo aahaTen

qaht-e-sada-e-dostan phir se samaaton mein hai

jin mein nihan raha kabhi nikhat-o-gul ki qurbaten

had-e-zamin-o-asman ab inhi rabton mein hai

kisi ne zamin ke jism se fasl-e-visal chhin li

arsa-e-hashr sa bapa ruh ki khetiyon mein hai

dil se lahu ke shor tak zaKHm ka silsila rawan

shorish-e-bahr-e-be-karan aaj se phir ragon mein hai

aalam-e-be-hijabi-e-jaan ka saman kuchh aur tha

har bun-e-mu ka harf-e-dil yun to khula labon mein hai

tare se samt bhi alag naw se rah bhi juda

ramz-e-musafirat chhupa chup ke samundaron mein hai