sannaTe mere ghar mein bhi mehman bahut hain

sannāTe mire ghar meñ bhī mehmān bahut haiñ

tanhā.ī se ab vo bhī pareshān bahut haiñ

daulat kī tarah zaḳhm chhupā.e hue rakhnā

is shahr ke logoñ pe namakdān bahut haiñ

aivān laraz jā.eñge aa.egā vo din bhī

zehnoñ meñ machalte hue tūfān bahut haiñ

naqshe meñ kahāñ DhūñD rahe ho rah-e-āsāñ

himmat ho to sab rāste āsān bahut haiñ

jo log añdheroñ meñ banā lete haiñ jannat

vo din ke ujāloñ se pareshān bahut haiñ

vaise to zamāne kī ḳhabar rakhte haiñ ham log

afsos magar ḳhud se hī anjān bahut haiñ

ai 'hosh' mu'āfī bhī nahīñ un ko gavārā

aur apnī ḳhatā par bhī pashemān bahut haiñ

sannaTe mere ghar mein bhi mehman bahut hain

tanhai se ab wo bhi pareshan bahut hain

daulat ki tarah zaKHm chhupae hue rakhna

is shahr ke logon pe namakdan bahut hain

aiwan laraz jaenge aaega wo din bhi

zehnon mein machalte hue tufan bahut hain

naqshe mein kahan DhunD rahe ho rah-e-asan

himmat ho to sab raste aasan bahut hain

jo log andheron mein bana lete hain jannat

wo din ke ujalon se pareshan bahut hain

waise to zamane ki KHabar rakhte hain hum log

afsos magar KHud se hi anjaan bahut hain

ai 'hosh' mu'afi bhi nahin un ko gawara

aur apni KHata par bhi pasheman bahut hain