sapne gae sukun bhi ulfat chali gai

sapne ga.e sukūn bhī ulfat chalī ga.ī

milne kī apne aap se fursat chalī ga.ī

merī to bolne kī hī 'ādat chalī ga.ī

tere hī saath saarī sharārat chalī ga.ī

ḳhushiyāñ thiiñ us se ghar meñ thiiñ āñgan meñ raunaqeñ

biTiyā ke saath ghar kī bhī barkat chalī ga.ī

chhūTā tumhārā saath to baaqī hī kyā bachā

dil meñ jo pal rahī thī vo hasrat chalī ga.ī

aate nahīñ faqīr na saa.il bhī āj-kal

maañ kyā ga.ī ki ghar kī rivāyat chalī ga.ī

mere suḳhan pe tū ne uThā.īñ jo uñgliyāñ

merī tamām 'umr kī mehnat chalī ga.ī

yuuñ bhī kabhī jahān meñ ifrāt meñ na thī

thoḌī bahut thī vo bhī sadāqat chalī ga.ī

hotī nahīñ hai she'r kī aamad bhī ab 'nazar'

tum kyā ga.e ki lafz kī tāqat chalī ga.ī

sapne gae sukun bhi ulfat chali gai

milne ki apne aap se fursat chali gai

meri to bolne ki hi 'adat chali gai

tere hi sath sari shararat chali gai

KHushiyan thin us se ghar mein thin aangan mein raunaqen

biTiya ke sath ghar ki bhi barkat chali gai

chhuTa tumhaara sath to baqi hi kya bacha

dil mein jo pal rahi thi wo hasrat chali gai

aate nahin faqir na sail bhi aaj-kal

man kya gai ki ghar ki riwayat chali gai

mere suKHan pe tu ne uThain jo ungliyan

meri tamam 'umr ki mehnat chali gai

yun bhi kabhi jahan mein ifraat mein na thi

thoDi bahut thi wo bhi sadaqat chali gai

hoti nahin hai she'r ki aamad bhi ab 'nazar'

tum kya gae ki lafz ki taqat chali gai