sar-ba-sar shaKH-e-dil hari rahegi

sar-ba-sar shāḳh-e-dil harī rahegī

tā-abad aañkh meñ tarī rahegī

maiñ ne qissa hī paak kar Daalā

ishq hogā na ḳhud-sarī rahegī

aks bante raheñge pesh-e-nazar

sūrat-e-ā.īna-garī rahegī

satr-dar-satr ḳhuuñ jalāyā hai

lafz meñ raushnī bharī rahegī

ḳhāmushī oḌh lī daraḳhtoñ ne

ārzū-e-suḳhan-varī rahegī

koī manzil talāsh lī jaa.e

ab kahāñ tak ye be-gharī rahegī

baaġh meñ hai qayām kā mauqa.a

sab parindoñ se dilbarī rahegī

kyā hamesha bhaTaknā hai mujh ko

kyā hamesha subuk-sarī rahegī

zindagī se Darī rahūñgī maiñ

zindagī saa.e se Darī rahegī

chāñd agar Duub bhī gayā 'māhīn'

taaq par chāñdnī dharī rahegī

sar-ba-sar shaKH-e-dil hari rahegi

ta-abad aankh mein tari rahegi

main ne qissa hi pak kar Dala

ishq hoga na KHud-sari rahegi

aks bante rahenge pesh-e-nazar

surat-e-aina-gari rahegi

satr-dar-satr KHun jalaya hai

lafz mein raushni bhari rahegi

KHamushi oDh li daraKHton ne

aarzu-e-suKHan-wari rahegi

koi manzil talash li jae

ab kahan tak ye be-ghari rahegi

bagh mein hai qayam ka mauqa

sab parindon se dilbari rahegi

kya hamesha bhaTakna hai mujh ko

kya hamesha subuk-sari rahegi

zindagi se Dari rahungi main

zindagi sae se Dari rahegi

chand agar Dub bhi gaya 'mahin'

taq par chandni dhari rahegi