sar-e-aina hairani bahut hai

sar-e-ā.īna hairānī bahut hai

sitamgar ko pashemānī bahut hai

ḳhirad kī garche arzānī bahut hai

junūñ kī jalva-sāmānī bahut hai

sabhī vahshī yahīñ par aa rahe haiñ

mire ghar meñ bayābānī bahut hai

yahāñ har-chand sab ḳhush-pairahan haiñ

magar dekho to uryānī bahut hai

na jaane kab mirī muTThī meñ aa.e

vo ik lamha ki arzānī bahut hai

ajab uljhan ki chup rahnā bhī mushkil

jo kah duuñ to pashemānī bahut hai

maiñ samt-e-dasht jaanā chāhtā thā

magar us meñ tan-āsānī bahut hai

bhulā kar baiThtā huuñ har kisī kā

abhī mujh meñ ye nādānī bahut hai

ḳhudāyā joḌ kyā hai ishq-o-dil kā

tirī baḳhshish pe hairānī bahut hai

zamīñ ko raas kab aa.egā 'irfāñ'

vo harf-e-haq ki nuqsānī bahut hai

sar-e-aina hairani bahut hai

sitamgar ko pashemani bahut hai

KHirad ki garche arzani bahut hai

junun ki jalwa-samani bahut hai

sabhi wahshi yahin par aa rahe hain

mere ghar mein bayabani bahut hai

yahan har-chand sab KHush-pairahan hain

magar dekho to uryani bahut hai

na jaane kab meri muTThi mein aae

wo ek lamha ki arzani bahut hai

ajab uljhan ki chup rahna bhi mushkil

jo kah dun to pashemani bahut hai

main samt-e-dasht jaana chahta tha

magar us mein tan-asani bahut hai

bhula kar baiThta hun har kisi ka

abhi mujh mein ye nadani bahut hai

KHudaya joD kya hai ishq-o-dil ka

teri baKHshish pe hairani bahut hai

zamin ko ras kab aaega 'irfan'

wo harf-e-haq ki nuqsani bahut hai