sar-e-ashufta par purkhon ki pagDi bandh rakkhi hai

sar-e-āshufta par purkhoñ kī pagḌī bāñdh rakkhī hai

kisī kā naam likh kar maiñ ne muTThī bāñdh rakkhī hai

koī to rāsta mujh ko dikhā.e merī manzil kā

mohabbat ne mirī āñkhoñ pe paTTī bāñdh rakkhī hai

bahut betāb hai ġharqāb hone ko vo dariyā meñ

mire hoñToñ pe ḳhushkī ne jo kashtī bāñdh rakkhī hai

kahīñ is baar bhī pyāsī tirī yādeñ na rah jaa.eñ

so āñkhoñ ne mirī palkoñ se naddī bāñdh rakkhī hai

tirī yādoñ ke jhoñkoñ se kahīñ khul kar na gir jaa.e

bichhaḌ ke tujh se dil par jo tasallī bāñdh rakkhī hai

zarā parda haTā kar khol de ab dast-e-nāzuk se

darīche ne nazar merī tarastī bāñdh rakkhī hai

tirī tārīf ke pul bāñdhne meñ hai magan dhaḌkan

havā be-tābiyoñ ne dil meñ kaisī bāñdh rakkhī hai

anā merī banā Daale na us ko maut kā phandā

mire pairoñ meñ tū ne jo ye rassī bāñdh rakkhī hai

safar meñ dūsre raḳht-e-safar aate haiñ kab tak kaam

so ab un kī duāoñ kī ye gaThrī bāñdh rakhī hai

añdhere dum dabā.e phir rahe haiñ bad-havāsī meñ

havā mere charāġhoñ ne kuchh aisī bāñdh rakkhī hai

zamīn-e-dil pe merī ik parinda aisā utrā hai

ki jis ne quvvat-e-parvāz merī bāñdh rakkhī hai

nahīñ 'shahbāz' mujh se aag kī lapTeñ nahīñ lipTīñ

badan se maiñ ne apnī āp-bītī bāñdh rakkhī hai

sar-e-ashufta par purkhon ki pagDi bandh rakkhi hai

kisi ka nam likh kar main ne muTThi bandh rakkhi hai

koi to rasta mujh ko dikhae meri manzil ka

mohabbat ne meri aankhon pe paTTi bandh rakkhi hai

bahut betab hai gharqab hone ko wo dariya mein

mere honTon pe KHushki ne jo kashti bandh rakkhi hai

kahin is bar bhi pyasi teri yaaden na rah jaen

so aankhon ne meri palkon se naddi bandh rakkhi hai

teri yaadon ke jhonkon se kahin khul kar na gir jae

bichhaD ke tujh se dil par jo tasalli bandh rakkhi hai

zara parda haTa kar khol de ab dast-e-nazuk se

dariche ne nazar meri tarasti bandh rakkhi hai

teri tarif ke pul bandhne mein hai magan dhaDkan

hawa be-tabiyon ne dil mein kaisi bandh rakkhi hai

ana meri bana Dale na us ko maut ka phanda

mere pairon mein tu ne jo ye rassi bandh rakkhi hai

safar mein dusre raKHt-e-safar aate hain kab tak kaam

so ab un ki duaon ki ye gaThri bandh rakhi hai

andhere dum dabae phir rahe hain bad-hawasi mein

hawa mere charaghon ne kuchh aisi bandh rakkhi hai

zamin-e-dil pe meri ek parinda aisa utra hai

ki jis ne quwwat-e-parwaz meri bandh rakkhi hai

nahin 'shahbaz' mujh se aag ki lapTen nahin lipTin

badan se main ne apni aap-biti bandh rakkhi hai