sar-e-falak hai ki zer-e-zamin pata na chala

sar-e-falak hai ki zer-e-zamīñ pata na chalā

tirā vajūd to hai par kahīñ pata na chalā

kahāñ chale ga.e vo boriyā-nashīñ āḳhir

tumheñ to kuchh bhī ai masnad-nashīñ pata na chalā

falak kā bojh zamīñ ne uThā liyā lekin

falak se bhī hai uThī ye zamīñ pata na chalā

tumhāre kūche tak aaya thā ek āvāra

phir us ke baa'd to us kā kahīñ pata na chalā

vo terā dar thā ki kāshī ki ḳhāna-e-kā’ba

kahāñ jhukā.ī thī maiñ ne jabīñ pata na chalā

'ajīb thī vo shab-e-vasl bhī 'nazar' jis meñ

vo mere paas bhī thā yā nahīñ pata na chalā

saḌak kī bhiiḌ ne is tarh mujh ko nochā thā

kahāñ thī jeb kahāñ āstīñ pata na chalā

sar-e-falak hai ki zer-e-zamin pata na chala

tera wajud to hai par kahin pata na chala

kahan chale gae wo boriya-nashin aaKHir

tumhein to kuchh bhi ai masnad-nashin pata na chala

falak ka bojh zamin ne uTha liya lekin

falak se bhi hai uThi ye zamin pata na chala

tumhaare kuche tak aaya tha ek aawara

phir us ke ba'd to us ka kahin pata na chala

wo tera dar tha ki kashi ki KHana-e-ka’ba

kahan jhukai thi main ne jabin pata na chala

'ajib thi wo shab-e-wasl bhi 'nazar' jis mein

wo mere pas bhi tha ya nahin pata na chala

saDak ki bhiD ne is tarh mujh ko nocha tha

kahan thi jeb kahan aastin pata na chala