sar-e-KHayal hai ye kaun agar nahin hun main

sar-e-ḳhayāl hai ye kaun agar nahīñ huuñ maiñ

jidhar talāsh rahe ho udhar nahīñ huuñ maiñ

ye taur-e-justujū thoḌā badal ke dekho na

maiñ aur kuchh bhī huuñ ik jism bhar nahīñ huuñ maiñ

ye kis kī shakl merī zaat par numāyāñ hai

mirī tarah to lage hai magar nahīñ huuñ maiñ

thakan safar kī sameTe hue huuñ paañv meñ

ye aur baat ki zer-e-safar nahīñ huuñ maiñ

guzarte dam zarā shā.istagī barat mujh se

maiñ ek zāt-e-bashar huuñ ki dar nahīñ huuñ maiñ

maiñ sochtā huuñ ki ab ishq hī karūñ tujh se

bahut dinoñ se kisī kaam par nahīñ huuñ maiñ

shab-e-javānī huuñ aisā na ho guzar jā.ūñ

so mujh ko jī lo ki phir umr bhar nahīñ huuñ maiñ

sar-e-KHayal hai ye kaun agar nahin hun main

jidhar talash rahe ho udhar nahin hun main

ye taur-e-justuju thoDa badal ke dekho na

main aur kuchh bhi hun ek jism bhar nahin hun main

ye kis ki shakl meri zat par numayan hai

meri tarah to lage hai magar nahin hun main

thakan safar ki sameTe hue hun panw mein

ye aur baat ki zer-e-safar nahin hun main

guzarte dam zara shaistagi barat mujh se

main ek zat-e-bashar hun ki dar nahin hun main

main sochta hun ki ab ishq hi karun tujh se

bahut dinon se kisi kaam par nahin hun main

shab-e-jawani hun aisa na ho guzar jaun

so mujh ko ji lo ki phir umr bhar nahin hun main