sar-e-shaKH-sar gulab hain ye jo KHwab hain

sar-e-shāḳh-sār gulāb haiñ ye jo ḳhvāb haiñ

kabhī ḳhār-zār-e-azāb haiñ ye jo ḳhvāb haiñ

tirī nisbateñ hoñ nasīb meñ to chamak uTheñ

mirī aarzū kā nisāb haiñ ye jo ḳhvāb haiñ

rahe qalb-e-ḳhāk meñ un kā nam baḌī der tak

sar-e-regzār-e-sahāb haiñ ye jo ḳhvāb haiñ

mirī kul kamā.ī hai fikr-o-sher kī raushnī

yahī mere ajr-o-savāb haiñ ye jo ḳhvāb haiñ

tire nutq ne jo raqam kiye the varq varq

ye vahī hurūf-e-kitāb haiñ ye jo ḳhvāb haiñ

tire lams-e-jāñ ke surūr kī ye kashīd haiñ

so mujhe to jām-e-sharāb haiñ ye jo ḳhvāb haiñ

na to vasl-e-fasl-e-bahār ho na hī tū mile

to maiñ sochtā huuñ sarāb haiñ ye jo ḳhvāb haiñ

tirī yād-tāroñ se jagmagātī ridā-e-shab

usī āsmāñ ke shahāb haiñ ye jo ḳhvāb haiñ

sar-e-shaKH-sar gulab hain ye jo KHwab hain

kabhi KHar-zar-e-azab hain ye jo KHwab hain

teri nisbaten hon nasib mein to chamak uThen

meri aarzu ka nisab hain ye jo KHwab hain

rahe qalb-e-KHak mein un ka nam baDi der tak

sar-e-regzar-e-sahab hain ye jo KHwab hain

meri kul kamai hai fikr-o-sher ki raushni

yahi mere ajr-o-sawab hain ye jo KHwab hain

tere nutq ne jo raqam kiye the warq warq

ye wahi huruf-e-kitab hain ye jo KHwab hain

tere lams-e-jaan ke surur ki ye kashid hain

so mujhe to jam-e-sharab hain ye jo KHwab hain

na to wasl-e-fasl-e-bahaar ho na hi tu mile

to main sochta hun sarab hain ye jo KHwab hain

teri yaad-taron se jagmagati rida-e-shab

usi aasman ke shahab hain ye jo KHwab hain