sar jhuka de jis jagah par tera diwana abhi

sar jhukā de jis jagah par terā dīvāna abhī

but-kada bhī ho to ban jaa.e ḳhudā-ḳhāna abhī

dil meñ baaqī hai agar jazb-e-kalīmāna abhī

dekhiyegā har jagah par nūr-e-jānāna abhī

vo nazar aate haiñ mujh ko be-hijābāna abhī

jazb-e-dil rahne de kuchh din aur dīvāna abhī

mā-sivā se be-ḳhabar hai aur begāna abhī

justujū meñ terī sar-gardāñ hai dīvāna abhī

kyoñ na har lamha fuzūñ ho josh-e-rindāna abhī

mil rahī hai un se paimāna-ba-paimāna abhī

kah rahā hai mast ho kar terā mastāna abhī

raqs meñ sāġhar hai gardish meñ hai paimāna abhī

ik kiran jalve kī tere rū-e-jānāna abhī

kar ga.ī hosh-o-ḳhirad se mujh ko begāna abhī

hosh meñ apne hai kuchh kuchh terā dīvāna abhī

ai nigāh-e-nāz koī aur paimāna abhī

tere hāthoñ se agar milte raheñ jām-o-subū

har qadam par Daal deñ buniyād-e-mai-ḳhāna abhī

tere hī jalvoñ se haiñ māmūr ye dair-o-haram

ka.aba dekhā dekh aa.e jā ke but-ḳhāna abhī

dil to pahle hī se un ko de chuke haiñ a 'shafī.a'

ek baaqī rah gayā hai sar kā nazrāna abhī

sar jhuka de jis jagah par tera diwana abhi

but-kada bhi ho to ban jae KHuda-KHana abhi

dil mein baqi hai agar jazb-e-kalimana abhi

dekhiyega har jagah par nur-e-jaanana abhi

wo nazar aate hain mujh ko be-hijabana abhi

jazb-e-dil rahne de kuchh din aur diwana abhi

ma-siwa se be-KHabar hai aur begana abhi

justuju mein teri sar-gardan hai diwana abhi

kyon na har lamha fuzun ho josh-e-rindana abhi

mil rahi hai un se paimana-ba-paimana abhi

kah raha hai mast ho kar tera mastana abhi

raqs mein saghar hai gardish mein hai paimana abhi

ek kiran jalwe ki tere ru-e-jaanana abhi

kar gai hosh-o-KHirad se mujh ko begana abhi

hosh mein apne hai kuchh kuchh tera diwana abhi

ai nigah-e-naz koi aur paimana abhi

tere hathon se agar milte rahen jam-o-subu

har qadam par Dal den buniyaad-e-mai-KHana abhi

tere hi jalwon se hain mamur ye dair-o-haram

kaba dekha dekh aae ja ke but-KHana abhi

dil to pahle hi se un ko de chuke hain a 'shafia'

ek baqi rah gaya hai sar ka nazrana abhi