sar jhuka leta tha pahle jis ko aksar dekh kar

sar jhukā letā thā pahle jis ko aksar dekh kar

aaj pāgal ho gayā us ko barābar dekh kar

ḳhvāhishoñ meñ bah gayā kamzor miTTī kā hisār

jism qatre meñ simaT aayā samundar dekh kar

sochtā huuñ raat ke andhe safar ke moḌ par

chāñd ghabrāyā to hogā ḳhālī bistar dekh kar

aañkh khulte hī har ik lamhe meñ merā aks thā

maiñ bikhar jaatā huuñ is khiḌkī ke bāhar dekh kar

tū hī utregā ḳharāboñ meñ farāz-e-arsh se

ham to behis ho chuke haiñ ab ye manzar dekh kar

chāñd takne kī tamannā le ke vāpas aa gayā

dūsroñ ke ghar ko apnī chhat se uupar dekh kar

ab to muḌ kar bhī kisī āvāz ko suntā nahīñ

jā-ba-jā bikhre hue saḌkoñ pe patthar dekh kar

mujh ko 'sarmad' apnī bhī pahchān tak baaqī nahīñ

shaḳhs ik apne hī jaisā apne andar dekh kar

sar jhuka leta tha pahle jis ko aksar dekh kar

aaj pagal ho gaya us ko barabar dekh kar

KHwahishon mein bah gaya kamzor miTTi ka hisar

jism qatre mein simaT aaya samundar dekh kar

sochta hun raat ke andhe safar ke moD par

chand ghabraya to hoga KHali bistar dekh kar

aankh khulte hi har ek lamhe mein mera aks tha

main bikhar jata hun is khiDki ke bahar dekh kar

tu hi utrega KHarabon mein faraaz-e-arsh se

hum to behis ho chuke hain ab ye manzar dekh kar

chand takne ki tamanna le ke wapas aa gaya

dusron ke ghar ko apni chhat se upar dekh kar

ab to muD kar bhi kisi aawaz ko sunta nahin

ja-ba-ja bikhre hue saDkon pe patthar dekh kar

mujh ko 'sarmad' apni bhi pahchan tak baqi nahin

shaKHs ek apne hi jaisa apne andar dekh kar