sar jhukata nahin kabhi shisha

sar jhukātā nahīñ kabhī shīsha

ham se kartā hai sar-kashī shīsha

kurra-e-nār hai mirā siina

shīsha-e-dil hai ātishī shīsha

dil meñ rakkhā thā us ko dil bhī gayā

uḌ ga.ī le ke ik parī shīsha

duḳhtar-e-raz pe zor-e-ālam hai

is parī se huā parī shīsha

ḳhuun rotā hai qahqahe ke saath

ḳhuub hañstā hai ye hañsī shīsha

zaḳhm-e-dil kā jo phaT gayā añgūr

ho.egā mai kā mustajī shīsha

yaad aatā hai mujh ko dil ai 'mehr'

dekhtā huuñ maiñ jab kabhī shīsha

sar jhukata nahin kabhi shisha

hum se karta hai sar-kashi shisha

kurra-e-nar hai mera sina

shisha-e-dil hai aatishi shisha

dil mein rakkha tha us ko dil bhi gaya

uD gai le ke ek pari shisha

duKHtar-e-raz pe zor-e-alam hai

is pari se hua pari shisha

KHun rota hai qahqahe ke sath

KHub hansta hai ye hansi shisha

zaKHm-e-dil ka jo phaT gaya angur

hoega mai ka mustaji shisha

yaad aata hai mujh ko dil ai 'mehr'

dekhta hun main jab kabhi shisha